Ndyangu Wu Vulavula Endzhaku Ka Ku Lahlekeriwa Hi N’wana Hi Ndlela Yo Vava!
Ku hehliwa leswaku Matome Thepa (10) u duvuriwile a lova hi tintangha ta yena timbirhi.
Ndyangu wa Matome Obert Thepa wa khume ra malembe hi vukhale wu tikuma wu ri karhi wu lwisana na ku lahlekeriwa loku nga ehleketiwiki, leswi swi ta endzhaku ka loko ku hehliwa leswaku Thepa u duvuriwile a lova hi tintangha ta yena timbirhi, va malembe ya 12 na 13, ekusuhi na xikolo xa Sekonye Secondary School eBotlokwa, Limpopo hi Ravuntlhanu, 29 Nhlangula.
Sweswi, ndyangu lowu tshovekeke timbilu wu lava vululami eka n’wana wa wona, wu kombela leswaku ku va ni vutihlamuleri eka vaehleketeleriwa Ku vikiwile leswaku vaehleketeleriwa lavambirhi va tirhise xibamu lexi a xi ri xa un’wana wa vakokwana wa vafana lava, loyi a nga hundza emisaveni khale swinene.
Mana wa mufi, Sello Thepa, u vule leswaku u navela leswaku nawu wu tirha eka vana lavambirhi naswona va fanele va pfaleriwa.
“Hi vilerisiwa hi ku hundza emisaveni ka n’wana wa mina hikwalaho ka vafana va vusopfa lava nga teka vutomi bya yena, naswona ndzi na ntshembo wa leswaku Maphorisa ma ta pfalela vaendli va vugevenga lebyi ekhotsweni.”
“Hambi leswi xibamu lexi nga tirhisiwa ku dlaya n’wana wa mina a ku ri xa mukhalabya wa kwala endyangwini lava nga lova khale, Mina ndzi ta kuma kurhula tsena loko vululami byi teka vundhawu,” ku vula yena.
Muvulavuleri wa maphorisa eLimpopo Colonel Malesela Ledwaba u vula leswaku tata wa mufana wa khume mbirhi wa malembe hi vukhale u kumile bayile a khomiwile.
“U khomiwile no hehliwa hi ku va na xibamu lexi nga riki enawini hi Sonto, 30 Mawuwana, naswona u ti vonakarisile ekhoto ya majistarata ya Botlokwa hi Musumbhunuku naswona hi Ravumbirhi, u ntshunxiwile hi beyili,” ku vula Ledwaba.
Maphorisa ya amukerile xivilelo mayelana na mhangu leyi, naswona loko va fika, mumangari u kombetele ekamareni ro etlela eka rona laha mufi a nga kumeka a etlele ehansi a ri karhi a huma ngati. Loko vatirhi va xilamulela-mhangu va fika, muhlaseriwa u tiyisisiwile leswaku u lovele endhawini ya mhangu
Hi ku ya hi Ledwaba, mufi a ri na xilondza lexi vonakaka ehlokweni, kasi Maphorisa ma kumile kwama lowu a wu tele hi matlulu ehenhla ka Mubedo.
“Mbhoni leyikulu yi nyikile maphorisa vuxokoxoko, yi hehla leswaku n’wana wa n’wini wa muti a a tlanga na vanghana va yena loko va kuma xibamu endlwini.,” Ku vula Ledwaba.
