Mutshwa A Gweviwa 20 wa malembe hi ku dlaya murhandziwa wa yena
Eka mhangu yo biha leyi nga tsekatsekisa vaaki va muganga wa Masehlaneng, Confidence Masemola, wanuna wa malembe ya 26 hi vukhale, u gweviwile ku tshama ekhotsweni malembe ya 20, hi swihehlo swo dlaya murhandziwa wa yena wa malembe ya 17 hi vukhale, Promise Dolamo, hi ti 20 ta August 2022.
Kuya hi vateki va Mahungu va Tzaneen voice, hi Ravuntlhanu, ra ti 19 Mhawuri , 2022, muhehliwa Masemola na mufi, Promise, va twananile leswaku va ta hlangana emugangeni wa Masehlaneng hi siku leri landzelaka.
A ku nga ri na munhu loyi a a ehleketa leswaku ku hlangana ka vona, swita siya xilondza eka ndyangu wa ka Dolamo.
Loko siku ra Mugqivela ri fika, varhandzani va hlanganile kutani va teka xiboho xo suka emugangeni wa Promise ku ya laha Confidence a tshamaka kona, naswona ku vikiwa leswaku muganga lowu wu kumeka eka mpfhuka wa ntlhanu wa tikhilomitara ku suka eMasehlaneng.
Exikarhi ka nhova ku sungurile njhekanjhekisano lowukulu exikarhi ka lavambirhi lani swinga endla leswaku Confidence a teka ribye a hlasela murhandziwa wa yena hi tihanyi ku kondza a lahlekeriwa hi vutomi bya yena.
Muehleketeleriwa, Loko a vona leswaku rinwi xerile ka mbirhi, u tihlanganisile na Nebo SAPS ku vika mhangu leyi.
Maphorisa va fikile laha mhangu yi nga humelela kona, laha va nga hlangana na Confidence etlhelo ka patu lerikulu. U va kongomise eka ntsumbu, lowu kumiweke eswihlahleni swa le kusuhi.
Mhangu leyi yi siyile vaaki va muganga wa Masehlaneng va ri karhi va chava no pfumala ku tshemba.
