Josefa Black Movers yi Tlakusiwa kuya ka SAFA Vhembe Regional League

Xipano xa Josefa Black Movers xi tiyisisiwile kuva xi tlakusiwile ku ya eka SAFA Vhembe Regional “SAB” League ka nguva leyi nga ta sungula ku nga ri khale, leswi swita enzhaka ka loko xi hlurile swipano swo tanihi Tomorrow All-stars, Gumbani young stars xikanwe na Magona United eka mintlangu ya Champ of the Champ leyi nga humelela hi mahelo ya vhiki.

Ku tlakusiwa ka Xipano xa Black Movers ku ya ka SAB Fourth League eAfrika dzonga a ku nga ri nchumu wo olova tanihi leswi swinga va tekela malembe leswaku va tlakusiwa ku ya eka ligi leyi. Mukaputeni wa Xipano Good u twa a khensa swinene kuva a kotile ku rhangela Xipano leswaku xi tlakusiwa.

Loko a vulavula u kombisile ku tsaka ka yena, a vula leswaku “Mina, ku katsa na vatlangi hinkwavo, hi tsakile swinene hi ku humelela loku. Loko kuri mina, ndzi tsakile swinene ku va ndzi rhangele xipano leswaku xi ya tlakusiwa eka nguva leyi”.

Riendzo ra vona a ri nga olovi tanihi leswi ka nguva leyinga hundza eka Collins Chabane Promotional League LFA Stream A, a va mphikizana na swipano swa matimba swo tanihi ku Mafuyetha, Josefa Cosmos, Matiyani Recreations hambi ku ri Mhinga Viaking.

Hambiswiritano, Vutshila na ku navela ka vona, swi va susumeterile leswaku va tirha hi matimba ku kota ku hlula eka Collins Chabane Promotional League LFA Stream A, leswi swi nga endla leswaku va va swin’wana swa swipano swa mune leswi a swi mphikizana eka Champ of the Champ eka nguva leyi.

Black Movers yi kombisile vutshila bya yona eka ku hlula loku hlamarisaka ka 5-2 eka Xipano xa Tomorrow All Stars, leswi siyeke vahlaleri va hlamarile hi vutshila bya Black Movers byo hlasela loko swita ka ntlangu wa bolo.

Black Movers yi yise emahlweni nxaxamelo wa yona wo hlula, lani yi nga hlula xipano xa Magona United hi nhlayo yo hlamarisa ya 3-1 eka ntlangu wo sungula hi sonto.

Xipano lexi hi siku ra sonto eka ntlangu wo hetelela, a xi langutane na xipano xa Gumbani Young Stars eka nyimpi yo tika. Ntlangu lowu wu kombisile leswaku Black Movers yina vutshila byo sirhelela, tani hi leswi va nga kota ku sirhelela ntlangu wu za wu fika emakumu, leswaku va tiyisisa ku hlula hi 1-0.

Ku tlakusiwa loku ku ya ka SAB swi fungha mhaka ya nkoka eka matimu ya Josefa Black Movers. Vantlangi va Black Movers va tsarisile mavito ya yona eka tibuku ta matimu ya bolo ya milenge etikweni ra ka Josefa