Mbhoni ya Nkoka eka Nandzu wa ku Dlaya yi kumiwile yi lovile
Maphorisa ya Mpumalanga ya le ku lavisiseni ka ku dlayiwa ka mbhoni ya nkoka eka nandzu wo dlaya lowu yaka emahlweni. Mbhoni leyi, a yi languterile ku tlanga xiphemu xa nkoka eka vulavisisi bya ku dlayiwa hi tihanyi ka muhlaseriwa wa xisati ekusuhi na Kereke ya IHC eHluvukani, Bushbuckridge, yi kumiwile yi lovile hi ndlela hi Sonto, August 13th, 2023.
Muvulavuleri wa maphorisa ya Mpumalanga, Brigadier Selvy Mohlala, u tiyisisile leswaku ntsumbu wa mbhoni wu kumiwile eUtah Grazing Camp, leyi kumekaka eti ndhawini ta Mhala.
“Ku hehliwa leswaku mbhoni yi dlayiwile hi nhlayo leyi nga tivekiki ya vaehleketeleriwa lava nga n’wi teka eOakley eCulcutta,” ku vula Muvulavuleri wa Maphorisa ya Mpumalanga Mohlala.
Rifu ra mbhoni leyi, ri pfuxe ku vilela lokukulu lani vaaki va vilelisiwaka hi vuhlayiseki bya vona hambi ku ri ku rhwexa vaehleketeriwa swigwevo swa ku dlaya wansati.
“Ku hundza emisaveni ka mbhoni ya nkoka swi ta tlhelerisela vulavisisi bya maphorisa endzhaku,” Mohlala u ye emahlweni a vula leswaku “Maphorisa a va titshege hi vumbhoni bya mbhoni leyi leswaku va ta kota ku simeka nandzu wa ku dlayiwa ka wansati hambi kuri ku hlengeleta vumbhoni ku tisa vaendli va vugevenga ehubyeni,”
Ku lahlekeriwa hi mbhoni ya nkoka hikwalaho ka rifu, a swi kavanyeti ntsena eka ku tengiwa ka nandzu kambe swi tlhela swi tlakusa ku vilela hi vuhlayiseki na nsirhelelo wa lava katsekaka tanihi timbhoni eka milandzu yo fana na leyi.
Brigadier Selvy Mohlala u tlherile a kombisa ku tinyiketela ka maphorisa ya Mpumalanga eka ku lavisisa hi vukheta ku dlayiwa ka mbhoni ya leyi. U engeterile a ku “Maphorisa ya tirha hi matimba ku paluxa xivangelo xa ku dlayiwa ka mbhoni na ku tiyisisa leswaku vululami bya endliwa.”
Mohlala u tlhele a hlohlotela mani na mani loyi a nga na mahungu yo fambelana na nandzu lowu ku ta emahlweni a ta luma Maphorisa ndlheve hi vugevenga lebyi.
