NPA Yi Teka Xiboho Xa Ku Tshika Mbalula
Vulawuri bya Vuchuchisi bya Rixaka [NPA] byi tekile xiboho xo ka byi nga hehli Matsalanankulu wa vandla ra African National Congress [ANC] Fikile Mbalula, leswi swi fambelana na xiviko xa Public Protector lexi humesiweke hi ti 19 N’wendzamhala 2019.
Xiviko a xikoxa leswaku NPA yi fanele ku languta eka xihehlo xa leswaku Sedgars Sports yi nyikile mali eka ndyangu wa Mbalula kuya e Dubai exikarhi ka N’wendzamhala 2016 na Sunguti 2017, loko a ha ri Holobye wa Vutshila na Ndhavuko na swa Mitlangu.
Musirheleri wa Vaaki, u endlile vulavisisi hi riendzo leri hi xikongomelo xo xupula mani na mani loyi a nga va a katsekile eka migingiriko ya vukungundzwana.
Kuya hi Muvulavuleri wa xifundzhantsongo xa NPA eka Gauteng Division, Pretoria Lumka Mahanjana u vurile leswaku Nandzu a wu pfuriwile exitichini xa maphorisa xa Brooklyn.
“Endzhaku ka vulavisisi bya maphorisa, lebyi kongomisiweke hi vachuchisi ehofisini ya Pretoria SCCU, na hofisi ya DPP, xiboho xo ala ku xupula mani na mani eka mhaka leyi xi tekiwile,” ku vula Muvulavuleri wa NPA wa Xifundzha Lumka Mahanjana.
Mahanjana u ya emahlweni a vula leswaku xiboho xo ala vuchuchisi xi ta endzhaku ka loko ku nga ri na vumbhoni lebyi seketelaka swihehlo swa vugevenga.
