Ndzawulo ya Dyondzo yi Angula Eka Swihehlo Swa ku herisiwa ka Swihambukelo Swa Magoji eSwikolweni
LIMPOPO- Ndzawulo ya dyondzo ya Limpopo yi hlamurile eka swihehlo leswi endliweke hi Holobye wa Democratic Alliance [DA] wa dyondzo ya masungulo, Baxolile Nodada, mayelana na swikolo leswi nga katsiwangiki eka nxaxamelo wa ku herisa swihambukelo swa magoji exifundzheninkulu.
Ndzawulo yi sindzisa leswaku swikolo hinkwaswo leswa ha tirhisaka swihambukelo swa magoji swi kamberiwile hi vukheta no katsiwile eka nxaxamelo wa swikolo leswi leswi swi fanelaka ku kuma swihambukelo swa kahle hi xahatla.
Ku herisiwa ka swihambukelo swa magoji eswikolweni i swivilelo leswi swi fambaka emahlweni eka swiphemu swo tala swa Afrika-Dzonga, tanihileswi switirhisiwa leswi swi tisaka makhombo lamakulu ya rihanyo na vuhlayiseki eka vadyondzi.
Muvulavuleleri wa ndzawulo ya Dyondzo ya Limpopo Mike Maringa, u tiyisisile vaaki leswaku a ku na swikolo leswi nga honisiwa kumbe ku susiwa hi vomu eka nxaxamelo wa swikolo leswi rhangisiweke emahlweni.
” Swikolo leswi hlayiweke ehansi ka xiyimo xa 1 swi titshege ntsena hi swihambukelo swa magoji Kasi, leswi swi hlayiweke ehansi ka xiyimo xa 2, swi na nhlanganelo wa swihambukelo, ku nga swa Magoji na swihambukelo swa Enviro-Loo,” ku vula Muvulavuleleri wa ndzawulo ya Dyondzo eLimpopo Mike Maringa.
Ndzawulo yi vula leswaku swikambelo swa vona swi endliwile hi ku hiseka na hi ku va erivaleni, hi xikongomelo xo lulamisa mhaka ya swihambukelo swa magoji eswikolweni hi ndlela leyinene hilaha swi nga kotekaka hakona.
Muvulavuleleri Maringa u tlherile a vula leswaku ndzawulo ya Dyondzo yi tshama yi tinyiketerile eka xileriso xa yona xo nyika dyondzo ya xiyimo xa le henhla loko yi ri karhi yi rhangisa vuhlayiseki bya vadyondzi.
“Ku herisiwa ka swihambukelo swa magoji eswikolweni i goza ra nkoka ro fikelela xikongomelo lexi, naswona matshalatshala ya ndzawulo ku lulamisa mhaka leyi ya fanele ku amukeriwa,” ku Ngimeta Maringa.
