Khombo Ro Tirhisa Swiyenge Swa Mabulo eka Rihanyo ra wena

SCIENCE – Swihangalasa mahungu swa swi yinge swa mabulo na thekinoloji swi dzime timitsu swinene evuton’wini bya hina bya siku na siku. Hambileswi swi nyikaka mimpfuno yo tala, yo tanihi ku antswisa vuhlanganisi na ku olovisa mfikelelo wa mahungu, swi tlhela swi va na nkucetelo wo biha eka rihanyo ra hina ra miehleketo.

Vulavisisi byi kombise leswaku ku tirhisa swiyenge swa Mabulo na thekinoloji ku tlula mpimo swi nga endla leswaku munhu a titwa a tshikilelekile emiehleketweni naswona a tlhela a ti twa a ri wexe evutonwini bya yena.

Ku tshamela ku amukela marungula yo hambana hambana, xikanwe na ntshikilelo wo lava ku hangalasa swifaniso swo kombisa tsako wa wena hambi ku ri ku va ka ndhawu ya manyunyu swi nga hoxa xandla hi ndlela yo biha emiehleketweni ya wena.

Hambiswiritano, ku ni magoza lawa hi nga ma tekaka leswaku hi hlayisa vuxaka lebyinene ni thekinoloji, kufana na leswi,

Tinyike nkarhi wo wisa: Vekela nkarhi wo karhi etlhelo siku rin’wana ni rin’wana leswaku u tihambanisa ni thekinoloji ivi u endla mintirho yin’wana yo tanihi ku hlaya, ku endla vutiolori kumbe ku heta nkarhi ni varhandziwa va wena.

Xin’wana I ku ti yingisela eka ndlela leyi u titwaka ha yona loko u tirhisa thekinoloji ni swihaxa-mahungu swa le ka Inthanete xikanwe na swiyenge swa Mabulo. Xiya mintlhaveko yihi na yihi yo biha leyi humelelaka kutani u ringeta ku vona swilo leswi pfuxaka swona.

Leswi swi nga ku pfuna ku lemuka swinene mikhuva ya wena ya xidijitali na ku endla swiboho leswi twisisekaka mayelana na ndlela leyi u tirhisaka thekinoloji ha yona.
Hikuya hi vulavisisi bya Lawrence Robinson na Melinda Smith, M.A, byi kombisa leswaku munhu un’wani na un’wana u fanele a veka mindzilakano, exikarhi ka vutomi bya yena na vutomi bya swiyenge swa Mabulo.

“Tanihi munhu u fanele ku veka mindzilakano leyi nga erivaleni loko swita ka matirhiselo ya wena ya thekinoloji, yo tanihi ku nga kambeli riqingho ra wena hi nkarhi wa swakudya kumbe u nga si etlela,” ku vulaLawrence Robinson na Melinda Smith, M.A.

“Naswona u fanele ku namarhela mindzilakano leyi ku ku pfuneta ku tumbuluxa vuxaka lebyi hanyeke kahle exikarhi ka wena na thekinoloji,” ku engetaLawrence Robinson na Melinda Smith, M.A.

Lawrence Robinson na Melinda Smith, M.A va tlhela va paluxa leswaku, munhu u fanele ku tinyiketele eka vuhlanganisi lebyi nga na nhlamuselo hikuva swiyenge swa Mabulo swi nga va switirhisiwa leswinene ku fana na ku tshama u ri mabulo na vanghana xikanwe na ndyangu wa wena.

“kambe swi nga tlhela swi endla leswaku u titwa u ri yexe na ku pimanisiwa vutomi bya wena na bya van’wani vanhu,” ku vula Lawrence Robinson & Melinda Smith.

“Kwalomu ka khume ra tiphesente ta vantshwa ku vikiwa leswaku va xanisiwa eka swihaxa-mahungu swa le ka inthanete naswona vatirhisi van’wana vo tala va vulavula hi ndlela leyi khunguvanyisaka,” ku vula Robinson & Smith.

Tinhlayo ti kombisa leswaku tipulatifomo ta swiyenge swa Mabulo to fana na Twitter, na Facebook i tindhawu leti ti rhangaka emahlweni hi ku hangalasa mavarivari lama vavisaka, mavunwa, na ku xanisiwa loku nga siyaka swivati swa mintlhaveko leswi nga heriki.

Tanihi munhu loyi a tirhisaka swiyenge swa Mabulo, tsundzuka ku tikhathalela eka inthanete na le handle ka inthanete, na ku lava mpfuno loko u lwisana na rihanyo ra wena ra miehleketo.