Muntshwa a Kongomise Filimi yakwe eka Ku Dyondzisa Vaaki Hi Vugevenga

GIYANI – Muntshwa wa kwala mugangeni u humese trailer ya filimi leyi kongomisiweke eka ku dyondzisa vaaki hi vuyelo bya vugevenga.

Trailer, leyi nga thyiwa leswaku “Movie ya ka Gaza,” yi humesiwile tin’hweti ti nga ri tingani leti hundzeke naswona se yi koke vunyingi bya vanhu rinoko eka inthanete.

Muntshwa loyi a nga khandziyisa trailer leyi,i Ndzivalelo Sithole, naswona i muaki wa muganga wa ka Siyandhani ehandle ka Giyani, Sithole u kombisa leswaku u na nkarhi wo leha a tirha eka indasitiri ya tifilimi hambi leswi a hlanganeke na mintlhotlho yo hambana siku na siku.

Sithole, U teke xiboho xo tumbuluxa trailer leyi endzhaku ko vona ku andza ka vugevenga endhawini ya laha a humaka kona na ku xiya leswaku vanhu vo tala a va swi tivi leswaku swiendlo swa vona swi ta va siya ekhotsweni, hambi kuri eswivandleni swa vafi.

“Trailer leyi yi endleriwe ku tsundzuxa vanhu hinkwavo emugangeni wa ka hina hi mhaka ya swita ndzhaku swa vugevenge,” ku vula Ndzivalelo Sithole muendli wa filimi leyi ya ka Gaza.

“Hi fanele ku twisisa leswaku xiboho xin’wana na xin’wana lexi hi xi endlaka xi na vuyelo, naswona hi fanele ku lemuka nkucetelo lowu swiendlo swa hina swi nga na wona eka van’wana vanhu” Ku vula Sithole.

Trailer leyi, yi kombisa swifaniso swa matimba swa vugevenga, na mintlhaveko leyi vugevenga byi nga na yona eka vaaki va hina hi ku angarhela. Sithole u tshemba leswaku trailer leyi yi ta hlohlotela vanhu ku teka magoza no nghenelela swinene eku siveleleni ka vugevenga eka muganga wihi na wihi hiku angarhela.

“Hinkwerhu hi na xiave lexi hi faneleke ku xi tlanga leswaku hi tumbuluxa muganga lowu hlayisekeke,” ku vula Sithole. Trailer leyi, yi endle leswaku ku va na mahungu yo tala eka swiyenge swa Mabulo naswona yi hangalakile ngopfu eka vaaki vo hlaya swinene.

Vanhu votala va bumabumerile Sithole eka matshalatshala ya yena yo dyondzisa hi vugevenga naswona va kombisile nseketelo wa vona eka hungu ra yena.

“Ndzi vona swi ri le swinene ku va munhu un’wana emugangeni wa ka hina a teka goza ro dyondzisa vanhu hi vuyelo bya vugevenga,” ku vula muaki Maluleke Nyiko.

“I swa nkoka leswaku un’wana na un’wana a tiva vuyelo bya swiendlo swa yena na ku tirhisana ku tumbuluxa ndhawu leyi hlayisekeke,” ku engeta Maluleke.

Sithole, u kunguhata ku humesa filimi hinkwayo eku heleni ka lembe leri naswona u tshemba leswaku yi ta ya emahlweni yi dyondzisa no hlohlotela vanhu leswaku va papalata vugevenga.

“Hi ni matimba yo endla ku hambana. A hi tirhisaneni ku tumbuluxa muganga lowu hlayisekeke no rhula eka un’wana na un’wana,” Sithole a gimeta.