Vantshwa va Giyani va tirha kahle
Hi Orlando Chauke
Hi ku ya hi Laurence Mdlovu, mutshamaxitulu wa Far East Milano Stars Academy ePitori, makume mbirhi n’we wa vatlangi lavatsongo vo huma eGiyani lava sunguleke tidyondzo ta vona eka xikolo lexi eku sunguleni ka Mawuwani kombisa nhluvuko lowu tshembisaka.
Loko a ri karhi a nyika vuxokoxoko eka vatswari hi ku tirhisa Muzaberi Gezani Mashaba, loyi a nga muzaberi wa khale loyi a tirhaka ehansi ka SAFA Mopani eGiyani loyi a pfuneke ku kuma vatlangi, Mdlovu u va tiyisisile leswaku hinkwaswo swi famba kahle na leswaku vatlangi va karhi va tolovela ndhawu ya vona leyintshwa.
“Hi ku ya hi matirhelo ya vona eka ndzetelo, ndzi nga mi tiyisekisa leswaku 90% wa vona va sungurile ku kombisa vuswikoti bya xiviri eka ntlangu wa bolo ya milenge. Va tlanga kahle naswona va tolovela hi ku hatlisa swinene ndhawu ya vona leyintshwa,” ku vula yena, a engetela leswaku va ta tlangela xipano xa Sundowns Development ku nga ri khale.
“Loko hinkwaswo swo famba kahle, van’wana va vona va ta nghenisiwa eka xipano xa Sundowns. Hi tlhela hi va na mutlangi wun’we wo huma eGiyani, Singita, loyi se a nga eku tlangeni eka xipano xa ABC Motsepe. Va n’wi tsakela, naswona ndzi langutele ku twa ku nga ri khale loko va ta n’wi sayina kumbe e-e,” ku vula yena
Hi nkarhi lowu fanaka, Mudzaberi Gezani Mashaba, loyi a nga tlanga xiave xa nkoka eku tshubuleni ka vafana lava, u komberile vatswari ku seketela mintirho leyi nga vaka kona ya vana va vona, a vula leswaku ku pfumaleka ka nseketelo swi sivela nhluvukiso wa mintirho ya vona ya bolo ya milenge.
“Xin’wana lexi vatswari hakanyingi va nga xi twisisiki hileswaku ku nghena xikolo xa bolo ya milenge a hi mahala; ku na switandzhaku swa ntsengo. Tiakhademi leti ti nyika dyondzo ya xiyimo xa le henhla, ndzetelo, na ku hlangana na swipano swa le henhla. Ndzi twa vatswari vo tala va vilela hi ku boheka ku hakela mali, va rivala leswaku vafana va vona va tsarisile eswikolweni swa kahle swa phurayivhete, laha xikolo lexi xi tlhelaka xi katsa swakudya na vutshamo,” ku hlamusela Mashaba.
Mashaba u kandziyisile leswaku vatswari va fanele ku twisisa leswaku nkarhi wun’wana u fanele ku tinyikela nyana ku yisa emahlweni mintirho ya vana va vona ya bolo ya milenge.
“Loko vatswari va nga swi lavi ku va seketela, talenta ya vona yi nga ha hundzuka ritshuri, naswona va nga ha hundzukela eka byala,” a va tsunduxa. U avelane xitori xa mufana wo huma eka Section-E, Godfrey Mahlale, loyi mana wa yena eku sunguleni a nga ala ku n’wi kumela ‘passport’ rotlanga bolo ya milenge, a vula leswaku a nga ri na mali hikuva i manana wa xisiwana loyi a nga yexe loyi a hanyaka hi ku xavisa byalwa bya xintu.
“Ndzi sindzisile ku kondza a pfumela, naswona swi humelerile kahle eka mufana loyi hikuva endzhaku Orlando Pirates yi n’wi tsarisile eka xikolo no n’wi letela ku va wun’wana wa vatlangi va vona lavanene,” u ye emahlweni, a tshikelela nkoka wo rhumela vatlangi lavatsongo eka xikolo xa bolo ya milenge swikolo.
“Swikolo leswi swi le kusuhi na swipano swa PSL, leswi nyikaka vatlangi nkarhi wa nkoka wo voniwa hi swipano leswikulu swa PSL. Khombo ra kona, nkarhi wolowo a wu kona etindhawini ta hina ta le makaya, hi swona swi endlaka leswaku swi va swa nkoka eka vona ku ya eGauteng ku ya tsarisa eka swikolo leswi ” ku engetela yena.
