Vaehleketeleriwa va ku ncela migodi swi nga riki enawini va khomiwa
Matshalatshala ya nhlanganelo yo sindzisa nawu, ku katsa na tiyuniti ku suka eka Vuthu ra Vusirheleri bya Rixaka ra Afrika-Dzonga na Xipano xa Nhlamulo ya Maqhinga ya SAPS, swi endle leswaku ku va na ku tshikileriwa lokukulu eka migingiriko ya ncela migodi leyi nga riki enawini eXifundzhenikulu xa Limpopo.
Vaehleketeleriwa vo hlaya va khomiwile hikwalaho ka ku ncela migodi leyi nga riki enawini na ku tlula milawu ya vuhlapfa hi nkarhi wa ntirho wo kavanyeta lowu tivekaka tani hi “Vala Umgodi.”
Hi madyambu ya Sonto, Nyenyanyani 18, 2024, muehleketeleriwa wa xinuna wa malembe ya 47 hi vukhale u khomiwile eGiyani, exifundzhenintsongo xa Mopani, loko ku hehliwa leswaku a ri karhi a lulamisa tinsimbi leti ehleketeleriwa ku va a lo ti ncela emugangeni wa ka Xikukwani.
Switirhisiwa swa le mugodini, ku katsa ni foxolo, xipedi, piki ni minkwama leyi teleke hi tinsimbi ta risima, swi tekiwile endhawini yoleyo. Ku engetela kwalaho, khume mune wa minkwama ya tinsimbi leti ehleketeleriwa ku va ta risima yi tekiwile eka ndhawu yi n’wani emugangeni wa ka Mavalani.
Eka mhangu yo hambana hi Mugqivela, Nyenyanyani 17, 2024, muehleketeleriwa wa malembe ya 44 hi vukhale u khomiwile ekusuhi na Beitbridge Port of Entry ehandle ka Musina hikwalaho ko chayela a dakwile egondzweni ra N1 Highway.
Ku khomiwa kun’wana ku endliwile exifundzhenintsongo xa Sekhukhune, laha mune wa vaehleketeleriwa va xinuna va malembe ya le xikarhi ka 19 na 48 va khomiweke hikwalaho ka ku ncela migodi leyi nga riki enawini, ku tlula nawu wa vuhlapfa, na ku xavisa fole leri nga riki enawini.
Vatirhela-mfumo va nawu va kume switirhisiwa swa migodi, ku katsa ni muchini wa New Holland TLB, naswona va kume mindzhwalo ya khume ya chrome leyi hlengeletiweke endhawini leyi nga riki enawini ya migodi.
Mavuthu ya swiyenge swo hambana lama katsekaka eka Operation Vala Umgodi ya tiyisisa matshalatshala yo lwisana na migodi leyi nga riki enawini, ku tlula nawu ka vuhlapfa, na ku xavisiwa ka fole loku nga riki enawini.
Vaehleketeleriwa lava khomiweke va languteriwile ku ya emahlweni ka Tikhoto to hambana ta Majistarata hi Ravumbirhi, Nyenyanyana 20, 2024.
Ntirho lowu wu kandziyisa ku tinyiketela ka tiejensi to sindzisa nawu ku sivela migingiriko leyi nga riki enawini na ku hlayisa vuhlayiseki eXifundzheninkulu xa Limpopo.
