Phorisa Ri Duvuriwile Ri lova, Loko Riri karhi ri Hlamula eka ku Phanghiwa ka xitolo

Sejeni Vusi Siwela (38) na Phorisa kulobye a va ri endleleni yo ya eka xiviko xa ku phanghiwa ka bindzu hi Musumbhunuku nimixo loko a ta duvuriwa a hundza hi swingevenga.

Kasi loko Phorisa lerin’wana ri hatlisiseriwe exibedlhele ku ya kuma vutshunguri hikwalaho ka ku duvuriwa hi swibamu. Kuya hi muvulavuleri wa Maphorisa eMpumalanga Selvy Mohlala, vaehleketeleriwa vatirhisile swibuluki ku koya ku nghena eka vhenge leri.

Mohlala u hlamuserile leswaku loko va kuma vuxokoxoko mayelana na ku phanghiwa ka swilo, maphorisa lawa mambirhi ya hatle ya fika laha mhangu a yi humelela kona. Hambiswiritano, va hlanganisiwile hi matlulu ya swibamu kusuka eka vaehleketeleriwa lava hlomeke.

“Lexi twisaka ku vava, Sejeni Siwela u lahlekeriwe hi vutomi bya yena laha mhangu yi nga humelela kona, kasi mutirhi kulobye u vavisekile,” ku vula Mohlala.

Mohlala u boxe leswaku vaehleketeleriwa va swi kotile ku baleka na mali leyi nga tivekiki na fole leri humaka exitolo lexikulu.