Muzamberi Chabalala ava na ntshembo hambileswi ku nga na ku pfumaleka ka vatlangi eka Xipano
Team G-One FC, leyi yi ntlangaku ka ligi ya Collins Chabane ya Stream D, yi langutane na ntlhontlho lowukulu eka nguva leyi. Hambi leswi va tsariseke vatlangi vo tlula 35 nguva yi nga si sungula, xipano sweswi xi sale na vatlangi va 15 ntsena ku hetisa nguva ya sweswi ya LFA.
Xiyimo lexi xi vekile Team G-One FC eka xiyimo xo tika, kambe Muzamberi wa Xipano Chabalala u tshama a ri na ntshembo eka xipano. “Xipano xi le ka xiyimo xa kahle, naswona hi ta ringeta hi matimba ku heta nguva hiri ka xiyimo nharhu 3 wa eka tafula ra ligi, hambileswi hi pfumalaka vatlangi,”
“Ina, hakunene hi na vatlangi va 15, kambe mi nga vileli hi sweswo. Lava i vatlangi va xiyimo xa le henhla lava nga tisaka vukorhokeri bya vona,” ku vula Muzamberi.
Xiyimo xa xipano xa sweswi xi kombisa nkoka wa ku pulana loku faneleke na ku tilulamisela eka mintlangu. Ku vaviseka, ku yimisiwa ni swiyimo swin’wana leswi nga languteriwangiki swi nga ha hatla swi herisa nxaxamelo, naswona ku pfumaleka ka vuenti swi nga va ni vuyelo lebyikulu eka matirhelo ya xipano. Kambe ku tshemba ka Muzamberi Chabalala eka vatlangi va yena lava saleke swi kombisa leswaku khwalithi yi kona.
Team G-One FC yi ta lava ku titshega hi vatlangi va yona lava saleke ku tlakuka no tirha hi ndlela leyinene loko yi lava ku heta nguva yi ri ka xiyimo xa nharhu, eka tafula ra Ligi. mintlhontlho yi tava kona, kambe hi ku tiyimisela na ku tirha hi matimba, xipano xi nga hlula xiphiqo xa xona xa sweswi.
Ligi yo tlakusa ya Collins Chabane Stream D i ligi leyi phikizanaka swinene, naswona ntlangu wun’wana na wun’wana i wa nkoka swinene. Varhandzi va nga langutela ku vona ntlangu wo tsakisa ku suka eka Team G-One FC loko va ri karhi va langutana na valala va vona hi xipano lexitsongo. Ku tiyisela ka xipano na ku tiyimisela loko xi langutane na maxangu swi ta va vumbhoni bya moya wa ntlangu lowu.
Hambi leswi Team G-One FC yi nga ha pfumalaka vatlangi, a yi pfumali hi khwalithi. Hi nkongomiso wa Muzamberi Chabalala na ku tiyimisela ka vatlangi, xipano xi nga hlula ntlhontlho lowu xi ya emahlweni xi phikizana eka xiyimo xa le henhla eka ligi.
