Mpheni Home Defenders na The Dolphins FC va lulamerile ku hlangana eka ntlangu wa nkoka wa Limpopo ABC Motsepe League
Hi Sonto, Mudyaxihi 7th, 2023, mahlo hinkwawo ya ta languta exitediyamu xa Oscar Mpetha eYunivhesiti ya Limpopo “Turfloop Campus“, tani hi leswi Xipano xa Mpheni Home Defenders xi nga ta hlangana na Xipano xa The Dolphins FC eka ntlangu wa nkoka wa Limpopo ABC Motsepe League. Xipano lexi nga ta hlula eka ntlangu lowu xi ta ya emahlweni xi yimela xifundzhankulu xa Limpopo eka ti-playoff ta Rixaka ta ku lwela kuva ka NFD eka nguva leyi taku [National promotional playoffs].
Xipano xa Mpheni Home Defenders, lexi sweswi xi tshameke eka xiyimo xa le henhla eka tafula ra Limpopo ABC Motsepe league Stream A, xi ta tiyisisa leswaku xa hlula eka xipano xa The Dolphins FC ku tlakusa ntshembo wa vona wa ka tlakusiwa ku ya ntlanga eka NFD nguva leyi taka. Xipano lexi xi ngimetile nguva ya xona kahle lani xi nga hlula eka mintlangu ya xona ya ntlhanu yo hetelela loko xi hlangana na swipano swo tanihi Winners Park, Giyani Happy Boys, Munaca FC, Musina United na Mikhado FC hi ku landzelelana.
Hi tlhelo rin’wana, Xipano xa The Dolphins FC na xona xihetile nguva xiri henhla eka tafula ra Limpopo ABC Motsepe League league stream B, naswona xi hlengeletini 34 wa mikuntla eka 14 wa mitlangu leyi xi nga yi tlanga. Xipano lexi xi languteriwile ku hlula eka xipano xa Mpheni Home Defenders, leswaku xi tlakusa ntshembo wa xona wa ku tlanga eka NFD. Xipano lexi a xi baa!!! kece-kece eka mavhiki lawa ya nga hundza, xi hlule mune eka mintlangu ya xona ya ntlhanu yo hetelela. Naswona va ta hlohloteriwa hi ku hlula ka vona ka sweswinyana eka PJ Stars FC hi 2-0 eka ntlangu wa vona wo hetelela.
Ntlangu lowu wu tshembisa ku va wo tsakisa, naswona swipano leswimbirhi swi na vatlangi va vuswikoti lava kotaka ku cinca ntlangu hi nkarhinyana. Varhandzi va nga langutela ntlangu wo tsakisa wa vutshila, ku tiyimisela, na ku navela erivaleni, tani hi leswi swipano leswimbirhi swi lwaka hi meno na swipikiri ku ti kuma swiri eka National Plays-off.
Ntlangu lowu wu lulamisiwile ku sungula hi awara ya nharhu nimadyambu, naswona swipano leswimbirhi swi ta va na ntshembo wa ku nghena lokukulu eka vaseketeri va swona. Moya eXitediyamu xa Oscar Mpetha wu languteriwa ku va wa le henhla, laha varhandzi va swipano leswimbirhi va nga ta huwelela matlhelo ya vona eka ntlangu hinkwawo.
Ntlangu wa Sonto exikarhi ka Mpheni Home Defenders na The Dolphins FC i ntlangu lowu u faneleke ku wu hlalela tanihi murhandzi wa bolo ya milenge exifundzheninkulu. Swipano leswimbirhi swi ta va swi nyikela hinkwaswo swa swona ku tiyisisa ku hlula na ku ya emahlweni eka ti playoffs ta ku tlakusa ta Rixaka.
