Josefa Derby: Xana Cosmos Yi Nga Rihisela Eka Black Movers?
Mugqivela wu ta va siku ro tika eka varhandzi va bolo ya milenge ya Josefa, tani hi leswi swipano swa Josefa Cosmos na Josefa Black Movers swi phikizanaka ku kuma tinhla tinharhu eka ku hlangana ka Collins Chabane promotional league LFA Stream A.
Nhlangano wa vona wo sungula eka nguva leyi wu vonile Josefa Black Movers yi hlula, hi 4-3. Xana Black Movers yi ta tlhela yi hlula yi ya emahlweni yiva ehenhla ka tafula ra ligi? Kumbe Cosmos yi ta rihisela eka ntlangu wo sungula?
Black Movers yi na ku navela ku tlhomiwa tinsiva loko ligi yifika emakumu, hikokwalaho va ta va va kongomisa ku hlula Cosmos eka derby leyi.
Hambiswiritano, Cosmos yi vile na nkombiso lowukulu eka Mphikizano wa Mpho Mathoho naswona yi na mintlangu yimbirhi ya ha ri kona, laha ku nga na nhlayo ya 14 wa mintlangu leyi tlangiweke eka ligi ku fikela sweswi naswona yi hlengelete nhlayo ya kahle ya tiphuinti.
Muzamberi wa Josefa Cosmos u vule leswaku va teka ntlangu wun’wana na wun’wana wu ri wa nkoka. U engetele hiku vula leswaku a va nge he endli xihoxo lexi fanaka nakambe.
A kombetela eka Josefa derby leyi nga humelela eka rhengu ro sungula ra ligi, laha Josefa Black Movers yi nga vuya kusuka eka 3-0 ku hlula ntlangu hi 4-3.
“Tanihi Josefa Cosmos, hi teka ntlangu wun’wana na wun’wana wu ri wa nkoka swinene naswona hi wu tshinelela hi matshalatshala yo fana,” ku vula muzamberi wa Josefa Cosmos.
“Xipano xa hina, hi ntokoto wa hina, hi ta phikizana eka ntlangu lowu handle ko teka magoza yo karhi yo hlamarisa ku kuma nkateko. Ematshan’wini ya sweswo, hi ta titshega hi leswi hi nga na swona naswona hi endla hinkwaswo leswi hi nga swi kotaka ku hlula, leswaku hi tava ka xivandla xa kahle eka ligi,” ku engeta muzamberi.
Josefa Black Movers Captain General u vule leswaku va langutele ntlangu wa xiyimo xa le henhla swinene tani hi leswi va nga ta nghenelela eka Josefa derby, ku nga ntlangu lowu vatlangi hinkwavo va navelaka leswaku xipano xa vona xi hlula.
“qhinga ra hina i ku tlanga bolo ya milenge tani hi xipano, naswona hi tlhela hi tirhisa rivala ra le kaya tani hi leswi hi nga ta tlanga rivala ra hina,” ku vula Black movers Captain.
“Ku sukela loko hi joyine LFA League, a hi si tshama hi hluriwa eka ntlangu wa le kaya. Hi tiyimisele ku lwa naswona xikongomelonkulu xa hina tani hi Black Movers i ku tlakusiwa eku heleni ka nguva,” ku vula Captain wa Black Movers.
U Yile emahlweni a boxe leswaku se hi hlule eka ntlangu wa rhengu ro sungula loko hi hlangana na Cosmos, naswona va lwela ku hlayisa nxaxamelo wa vona wo hlula wu ya emahlweni.
