Ku tlangeriwa siku ra Ndzhaka hi xitayele

Hi Ntsakisi Gracia Chauke

Mphikizano wa Bolo ya Miganga Top 16 Madonsi Lifestyle Tournament wu tisile goza ro tsakisa ra bolo ya milenge eka vaaki va le makaya hi Siku ra Ndzhaka, 24 Ndzhati 2024, endzhaku ko hundziseriwa emahlweni hi mahelo ya vhiki hikwalaho ka maxelo yo biha. Loko MaAfrika-Dzonga etikweni hinkwaro va tlangela mindhavuko ya vona yo hambana, ku ya emahlweni ka mphikizano ku nyikile ndhawu leyi hetisekeke ya vun’we bya vaaki na ku tiyisela.

Eku sunguleni mphikizano lowu a wu hleriwe ku teka ndhawu hi Mugqivela lowu hundzeke, mintlangu leyi yi hundziseriwe emahlweni hikwalaho ka timpfula leti siyeke rivala ri ri na mati naswona ri rhetela, leswi endleke leswaku rivala ri nga lulameli ku tlangela eka rona. kasi mintlangu ya Sonto lowu hundzeke yona hundziseriwe emahlweni eka siku ra Mugqivela lowu taka.

Vahleri va mphikizano va vone Siku ra Ndzhaka tani hi siku lerinene ro tlhela va sungula mphikizano, hi ku tekela enhlokweni leswaku i holideyi ya mani na mani naswona vazaberi va ta kumeka. “ hi mahelo ya vhiki na ti holideyi bolo yi kota ku amukela vanhu hinkwavo, kasi exikarhi ka vhiki, vinyi va swipano va ya emintirhweni loko vana va xikolo va ya exikolweni. Hikokwalaho siku leri ra Ndzhaka ra fanela ku yisa emahlweni mphikizano wa hina,” ku vula va Bolo ya Miganga eka xiyenge xa mabulo Facebook.

Siku ri sungurile hi ntlangu lowu a wu kombisa ku ombana swinene exikarhi ka Dzekula Mighty Stars FC na Merwe United FC, laha Merwe United yi nga hlula Dzekula hi 1-0. Eka ntlangu wa vumbirhi, Warriors FC yi langutane na Jilongo Killers, naswona yi hlurile hi 1-0 tani hi leswi Jilongo yi nga tsandzeka ku tirhisa nkateko wo howisa goli ntlangu wu nga si fika emakumu.

Ku tika ku vile kona eka ntlangu wa vunharhu exikarhi ka Jokozela Foundation na Madonsi Lifestyle, lowu nga hetelela swipano haswimbirhi swi nga howisanga na goli na yin’we. Swipano leswi swi boheke ku ya langutana eka tipenati, laha Madonsi Lifestyle yi nga kota ku hlula hi 4:3. Kasi ntlangu wo hetelela wa siku leri, Shivulani Tigers yi hlule Muchipisi United hi 1-0.

Mphikizano lowu a wu kombisanga ntsena talenta ya bolo ya milenge ya miganga kambe wu tlhele wu nyika moya wo hanya eka vaaki. “Moya eka ndhawu leyi wa hlamarisa, laha wun’wana na wun’wana a nga ti nyika nkarhi ku ta seketela swipano swa vona eka siku ra nkoka swonghasi eka ndhavuko wa hina,” ku vula wun’wana wa vahlaleri va bolo.

Eka mavhiki lama taka mphikizano lowu hleriweke hi va Bolo ya Miganga wu languteriwa ku yima nyana tanihi leswi ligi ya SAB yi nga ta sungula.