Vavanuna Vanharhu va Phangela Xitichini xo chela mafura xa Puma eka Makumeke
Vaaki va muganga wa ka Makumeke ehandle ka Malamulele va sale va ri ni ku chava endzhaku ka loko vavanuna vanharhu va phangerile xitichi xo chela petirolo xa Puma hi Sonto nimixo.
Mhangu leyi yi siye vaaki va ri ni ku chava, tanihi leswi vugevenge byo tani byi nga tolovelakangiku emugangeni, naswona vaaki vo tala va titwa va nga ntshunxekanga hi vuhlayiseki bya vona.
Kuya hi muvulavuleri wa maphorisa ya Malamulele Colonel Khuzwayo, vaehleketeleriwa va tsutsumile na mali leyi ringanaka kwalomu ka R2490-0.
” Ku engetela kwalaho, va tlhele va teka tiqingho timbirhi xikanwe na swakudya leswi swi durhaka ntsengo wa R30000-00,” ku vula Muvulavuleri wa Maphorisa Khuzwayo.
“Vaehleketeleriwa a va duvulanga munhu kumbe ku balesa, hambi leswi vambirhi va vona a vari na swibalesa, naswona vuxokoxoko bya vona a byi se tiveka eka karhi wa sweswi,” ku engetela muvulavuleri wa Maphorisa Khuzwayo.
Maphorisa ya sungurile vulavisisi eka mhangu leyi naswona va endla xikombelo eka mani na mani loyi a nga na vuxokoxoko lebyi nga endlaka leswaku vaehleketeleriwa va khomiwa leswaku a ti hlanganisa na vona.
“Hi tlhele hi kombela swirho swa vaaki ku tshama swi xalamukile no vika migingiriko yihi na yihi leyi kanakanisaka,” ku engetela Khuzwayo.
Vaaki va muganga wa Makumeke va hlohloteriwa ku tshama va rhulile no tirhisana na maphorisa eka matshalatshala ya vona yo khoma vaehleketeriwa.
