Muganga wu rila ku lahlekeriwa hi hosana

Hi Ntsakisi Gracia Chauke

Masipala wa muganga wa Collins Chabane wu tsekatsekisiwile hi ku tshuburiwa ka ntsumbu wa Vho-Musanda Ramabulana Matodzi, hosana ya muganga wa Vhulatathevhe, loyi a nga vikiwa leswaku u nyamalarile eku sunguleni ka nhweti leyi. Hi ti 20 ta Hukuri, Meyara Cllr Shadrack Maluleke, kun’we na vatirhi van’wana va masipala, va endzerile ndyangu wa ka Ramabulana lowu nga weriwa hi khombo ku ya nyika marito yo chavelela endzhaku ka ku lahlekeriwa loku khomisaka gome.

Vho-Musanda Ramabulana u endlile vutiolori byo koma emugangeni wa yena hi ti 2 n’hweti leyi loko nsati wakwe a karhi a n’wu lulamisela kuya eka nhlengeletano ya huvo ya vukosi eka siku rero. Loko va vona a nga vonaki nimadyambu, ndyangu wu sungule ku vilela kutani mixo lowu landzelaka va tivise va huvo ya vukosi no tlhela va vikela maphorisa nandzu wa ku nyamalala ka munhu.

Hi siku ra vu 14 n’hweti leyi, ku kumiwile ntsumbu lowu boleke exikarhi ka muganga wa Vhulatathevhe na Ratovhowa. Vativi va forensiki va tiyisisile leswaku i Vho-Musanda Ramabulana. Ku tshuburiwa loku ku hlamarise vaaki, naswona vo tala, ku katsa na meyara, va kombise ku vilela ka vona.

Hi nkarhi wa riendzo ra yena eka ndyangu wa ka Ramabulana, Meyara Maluleke u kombisile ku vilela lokukulu hi rifu ra murhangeri wa muganga, a vula leswaku i ku lahlekeriwa lokukulu eka ndyangu na vaaki hinkwavo. U hlamusele mahungu lawa tanihi nchumu wo chavisa swinene naswona u kandziyisile leswaku Vho-Ramabulana ari murhangeri loyi a xiximiwa loyi rifu ra yena ri nga hlamarisa vaaki.

Maluleke u kombele vaaki va Vhulatathevhe ku hlangana va seketela ndyangu wa ka Ramabulana hi nkarhi lowu wo tika. “A hi yimeni hi vun’we hi seketela ndyangu hi nkarhi lowu wo tika. Hi fanele ku va komba leswaku a va voxe ntsena eka gome leri,” a engetela.

Meyara a joyiniwe hi vatirhi va masipala, ku katsa na xipikara Cllr Thina Mbedzi na vakhanselara va miganga, ku nyika nseketelo eka ndyangu wa ka Ramabulana. Vulavisisi byi ya emahlweni, naswona valawuri va tshembisile ku tshama va ri karhi va tivisa hi vaaki. Vaaki va muganga lowu wu rila ku lahlekeriwa hi murhangeri wa vona loko va ri karhi va seketela ndyangu lowu nga hlangana na gome.