MEC a kambela mavhengele eRooiberg
MEC wa ndzawulo ya Nhluvukiso wa Ikhonomi, Ntivo-mbango, na Vupfhumba, Tshitereke Matibe, u rhangele ku kambela mavhengele ya swiphaza eRooiberg, exifundzhenintsongo xa Waterberg, endzhaku ka ku tlakuka ka timhangu ta swakudya chefu eswikolweni na le migangeni. Ntirho lowu, lowu endliweke ni vatirhela-mfumo va tindzawulo to hambana hambana, wu kambisise mavhengele ya 15 kutani wu kuma leswaku 13 ma tlula nawu hi ku xavisa swilo leswi hundzeriweke hi nkarhi, leswi onhakeke kumbe leswi thyakeke ni ku tirha handle ka mpfumelelo.
MEC Matibe u vula leswaku leswi i masungulo ntsena ya ku tshikileriwa ka mabindzu yo tano. “Loko hi ri karhi hi tiyisisa ku kula ka ikhonomi ya laha kaya, a hi nge swi pfumeleli swiyimo leswi khumbaka rihanyo ra vana va hina,” ku vula yena.
MEC Matibe u kandziyisile nkoka wo landzelela milawu ya swifundzankulu ku sirhelela vutomi, ngopfu ngopfu vana. Loko a ri karhi a seketela ku kula ka ikhonomi ya laha kaya, u sindzisile leswaku mabindzu ya fanele ku landzelela milawu. U tlhele a kombela Masipala wa Thabazimbi ku pfuneta mabindzu lama nga tsarisiwangiki eku kumeni ka mpfumelelo.
MEC u khensile ntlawa wa swiyenge swo hambana, ku katsa na Ndzawulo ya Timhaka Xikaya, eka xiave xa vona xo tlherisa vaaki va matiko mambe lava nga riki na maphepha. U komberile van’wamabindzu ku endla leswaku matirhelo ya vona ya va enawini naswona vaaki ku xava switirhisiwa leswi hlayisekeke, leswi humelerisiwaka laha tikweni.
