Winners Park yi ya yi tsandeka
Hi Orlando Chauke
Winners Park, xipano xa bolo ya milenge lexi nga sala xoxe xi yimele Giyani endzhaku ka loko Emanuel FC yi xavise ndhawu ya yona eka Selwane White Vultures na Giyani Happy Boys yi yimisiwile ku tlanga hikwalaho ka timhaka ta nawu, xi khomisa varhandzi va xona tingana eka nguva leyi.
Xipano lexi a xi le ku tirheni kahle ku sukela loko ku tava ku sungule ligi ya ABC Motsepe naswona xi tshama xi ri karhi xi hluriwa. Loko swilo swi nga antswi, Winners Park yi nga ha humesiwa eka ligi eka nguva leyi taka.
Winners Park a yi ti komba onge yi nga hlula hi Mugqivela no ya ehenhla eka ligi, leswi nyikeke ntshembo eka vaseketeri va yona. Kambe yi tlange hi ku ringana hi 0-0 loko yi hlangana na Munaca FC, leswi siyeke vaseketeri va yona va khunguvanyekile. Sweswi xipano lexi xi na mikutlunya ya mune ntsena eka mintlangu ya tsevu naswona a xi le ku tirheni kahle.
Xipano lexi xi le henhla nyana ka Thlothlokwe Golden Syrup, leyi nga na kutlunya wun’we eka mintlangu ya ntlhanu. Loko Thlothlokwe yo hlula eka ntlangu wa yona lowu landzelaka hi ku kuma tigoli to hlaya, Winners Park yi ta wela ehansi. Leswi swi vilerisile varhandzi vo tala va bolo ya milenge eGiyani hikuva Winners Park hi yona ntsena xipano lexi va nga xi seketelaka sweswi.
Swipano swin’wana swo hlayanyana na swona swi tlangile hi ku ringana hi mahelo ya vhiki.Tzaneen United na Black Leopards va hete ntlangu wa vona hi 0-0, Nkowankowa Continental na Selwane White Vuultures na vona va tlangile ku ringana hi 0-0.
Loko Musina United na Vondwe XI Bullets va vile na ku ringana hi 1-1, laha Musina yi nga howisa goli endzhaku ka nkarhi.
Vuyelo lebyi a byi cincanga ngopfu eka xiyimo xa ligi. Swipano swa mune – Vondwe XI Bullets, Musina United, Nkowankowa Continental, na Selwane White Vultures – hinkwaswo swi ringanile hi 11 wa mikutlunya endzhaku ka mintlangu ya tsevu. Vondwe XI Bullets yi rhangela ligi hikokwalaho ka ku va yi howise ti goli to hlaya.
Mpheni Home Defenders, xipano xin’wana lexi nga va na swiphiqo, xi le ka xiyimo xa vutsevu hi mintlangu ya ntlhanu leyi nga tlangiwa. Loko xo hlula eka ntlangu wa vona lowu landzelaka, swipano swa ntlhanu swi ta va na nhlayo leyi fanaka ya mikutlunya, leswi nga ta endla leswaku mphikizano wu tiya swinene.
