Swa koteka, ku vula Nkateko Salane

Share the News

Hi Ntsakisi Gracia Chauke

Nkateko Salane wa malembe ya 22 hi vukhale loyi a humaka emugangeni wa Hlengani eka Xikundu, ehandle nyana ka Malamulele exifundzheninkulu xa Limpopo, u hundzule vutomi bya yena hi ndlela yo hlamarisa.

Endzhaku ko tshika yunivhesiti hikwalaho ka swivangelo swo karhi, sweswi u nyikiwile mpfuno wa ‘scholarship’ kuya dyondza entsungeni wa malwandle. Leswi swi kombisaka leswaku ku tiyimisela na ku tiyisela swi nga endla leswaku munhu a humelela.

Salane u nyikiwe mpfuneto wa swa timali kumbe ‘scholarship’ leswaku a ya dyondzela vunjhiniyara [mechanical engineering] eYunivhesiti ya Dunaújváros eHungary.

Malembe ndzhaku, Salane u sungule tidyondzo ta yena eSaselamani ‘combined school’, loko a pasela ka Giredi ya 5 u yile exikolweni xa le hansi xa Vongani kutani a yisa tidyondzo ta yena emahlweni exikolweni xa le henhla xa EPP Mhinga, endzhaku ka sweswo u amukeriwe eYunivhesiti ya Wits kambe u hetelele a nga bi ntambhu.

Ku nga khathariseki ku tlhelela endzhaku loku, Salane a nga kalanga a lahlekeriwa hi ntshembo. U ye emahlweni a lava tindlela to yisa dyondzo ya yena emahlweni ku fikela loko a ta kuma mpfuneto wo ya dyondza etikweni rimbe.

Loko a burisana na muteki wa mahungu wa Nthavela vhiki leri, Salane u kombisile leswi a swi languteleke hi ntokoto na vutivi lebyi a nga ta byi kuma eHungary.

“Ndzi huma emugangeni lowu nga le matiko xikaya, naswona a hi na mati yo tala lama tengeke nkarhi wun’wana a hi na mati nikatsongo. Leswi ndzi nga ta dyondzela vunjhiniyara bya ‘mechanical’, xikongomelo xa mina lexikulu i ku dzikisa mianakanyo eka ku fikelela loku nga nyawuriki ka mati.

 

“Kasi loko ni ri etikweni rimbe ndzi ta kota ku langutana na mhaka leyi eka xikalo xa misava hinkwayo [Global scale], naswona hi ndlela yoleyo, ndzi ta kuma swintshuxo swin’wana leswi sekeriweke eka leswi ndzi nga ta dyondzisiwa eHungary hikuva entiyisweni swi hambanile nyana ku suka eka leswi hi dyondzisiwaka swona etikweni ra hina.Hi ndlela yoleyo ndzi ya eku dyondzeni no kuma vutshila lebyi ndzi nga byi tirhisaka ku pfuna miganga yo fana na leyi ndzi humaka eka yona,” ku vula Salane.

Loko a gimeta Salane u hlohlotele vantshwa ku tirha hi matimba ngopfu ngopfu lava va nga eka giredi ya 12, a vula leswaku ntsena munhu a kota ku kongomisa mianakanyo ya yena eka leswi a swi lavaka a nga swi fikelela.

“Swa koteka na swona i swa nkoka leswaku munhu a ti tshemba no tirha hi ku hiteka. Mpfuneto wo fana na ti ‘scholarship’ wa kumeka eka webusayiti ya ndzawulo ya tidyondzo ta le henhla,” a engetela.

 

 

 

 

 

 

 

 

 

 

Mathunse Hlukani

Hlukani Mathunse is a talented journalist and media professional with a passion for storytelling and community engagement.

Mathunse Hlukani has 369 posts and counting. See all posts by Mathunse Hlukani

Leave a Reply

Your email address will not be published. Required fields are marked *