Ntshembo wu nyikiwa vanhu lava hanyaka na vutsoniwa
Hi Ntsakisi Gracia Chauke
N’wambhuri wa Afrika Dzonga wa nyan’waka u endlile matimu hi ku va wansati wo sungula loyi a hanyaka na vutsoniwa byo fa tindleve ku hlula xidlodlo xa ndhuma. Ku hlula ka yena ku fungha goza ra nkoka ro ya emahlweni eka vuyimeri bya vanhu lava hanyaka na vutsoniwa.
N’wambhuri loyi a ha ku vekiwaka harhi ya vumbhurhi, Mia le Roux, u hlohlotele mamiliyoni ya vanhu hi ku tshova swihinga leswi langutaneke na vanhu lava hanyaka na vutsoniwa. Ku humelela ka yena a hi ku humelela ka yena n’wini ntsena kambe swi yisa ntshembo eka vaaki lava feke tindleve na vanhu van’wana lava hanyaka na vutsoniwa emisaveni hinkwayo.
Endzhaku ko tivisiwa tani hi muhluri endzhaku ka mphikizano lowu, Mia le Roux, u vule leswaku, “Ndzi wansati wo tinyungubyisa wa Afrika-Dzonga loyi a feke tindleve naswona ndza swi tiva leswaku swi njhani ku va munhu a nga katsiwi helo. Kambe ndzi khensa nhlangano wa ‘Miss South Africa’, lowu ndzi nyikeke mfikelelo eka misava ya lava katsekaka, naswona ndzi kongomisa ku tumbuluxa buloho leri hlanganisaka lava hanyaka na vutsoniwa na vanhu van’wana.”
Riendzo ra n’wambhuri wa Afrika Dzonga lontshwa a ri ri nchumu wo koma lowu nga hlohlotela vanhu. Leswi a lahlekeriweke hi ku twa a ha ri na lembe rin’we, u langutane ni swiphiqo swo tala loko a ri karhi a kula emisaveni leyi hakanyingi yi honisaka swilaveko ni titalenta ta lava hambaneke.
Hambiswiritano, a nga kalanga a pfumelela vutsoniwa bya yena byi n’wi hlamusela kumbe ku ringanyeta ku navela ka yena. Ku tiyimisela ka yena, ku hlanganisiwile na ku navela ka yena, swi n’wi endlile xikombiso eka van’wana lava langutaneke na mintlhontlho yo fana.
Kasi Pulatifomo ya yena tanihi n’wambhuri wa Afrika Dzonga yi languteriwile ku kongomisa eka ku lemukisa hi timhaka leti khumbaka vaaki lava feke tindleve, ku katsa na ku fikelela dyondzo, swivandlanene swa mintirho, ni nkoka wa ririmi ra mavoko.
Muhlanganisi tlhelo mulwela-vutomi bya vanhu lava hanyaka na vutsoniwa exifundzheninkulu xa Limpopo, Kwena Lamola, u byerile vateki va mahungu va CapricornFM leswaku u tshemba leswaku n’wambhuri, Mia Le Roux, loyi a ha ku vekiwaka harhi ya vumbhurhi, u ta va rivoni ra ku vonakala eka lava va lwisanaka na vutsoniwa.
“leswi swi ta tlanga xiave xa nkoka eka ku nyika matimba eka vanhu lava hanyaka na vutsoniwa, ku kombisa vumunhu bya vona, na ku tlakusa ku katseka ka vona eka migingiriko yo hambana,” ku hlamusela Lamola.
