Meyara a simeka pfhumba ro basisa mbango

Hi Ntsakisi Gracia Chauke

Vhiki leri, Muganga wa Mashau ehansi ka masipala wa muganga wa Collins Chabane, wu amukerile pfhumba ra meyara ra ku lemukisa hi mbango na ku basisa, ku fungha goza ra nkoka eka matshalatshala yo sirhelela na ku hlayisa miganga ya le makaya.

Vaaki vo hlaya va nghenelerile eka pfhumba leri laha va nga tirhisana na vatirhela-mfumo va masipala ku basisa muganga, ni ku dyondza hi nkoka wo basisa mbango ni maendlelo lama nga tirhisiwaka ku tiyisisa leswaku muganga wu tshama wu basile.

Siku hinkwaro ra vu 15 Mhawuri 2024, vaaki va endlile migingiriko yo fana na ku susa thyaka eswitarateni, ku byala mirhi ni ku pfuxeta tindhawu ta ntumbuluko. Loko dyambu ri tlomuta, switarata swa muganga wa Mashau ewadi 7 na tindzhawu tin’wana a swi vonaka swi basile, leswi hoxaka xandla eka ku tumbuluxa ndzhawu leyi hlayisekeke eka wun’wana na wun’wana.

Handle ka ku basisa, pfhumba leri ri tlhele ri kongomisa eka dyondzo. Ku khomiwe nhlengeletano yo dyondzisa vaaki hi ku lahliwa loku faneleke ka thyaka ni nkoka wa ku hlayisa swilo swa ntumbuluko swo fana ni milambu.

Hi nkarhi wa nhlengeletano, meyara Cllr. Shadrack Maluleke u byele vaaki va ndzhawu liya xikongomelokulu xa pfhumba na nkoka wa rona.

“pfhumba leri ro basisa ri ta tshama ri ri karhi ri simekiwa nkarhi ni nkarhi hi xikongomelo xo lava ku hlayisa vutomi no tiyisisa leswaku miganga ya hina yi tshama yi basile hi ndlela leyi nga onhiki mbango,” ku vula Maluleke.

Loko a engetela, Maluleke u vule leswaku ku basisa miganga swi antswisa rihanyo, swi sirhelela mbango, swi ndlandlamuxa khwalithi ya vutomi, swi tlakusa ikhonomi, hambi ku ri ku tlakusa ku kondletela.

Meyara a joyiniwe hi swirho swa komiti ya vulawuri, vakhanselara na swirho swa vufambisi bya le henhla. Pfhumba ro basisa ra meyara I ndlela yo hlanganisa vaaki na ku endla nkucetelo lowunene eka mbango.