Meyara Maluleke A Languta Swivilelo swa Vaaki na ku tshembisa Nhluvukiso eMasipala wa Collins Chabane

Eka nhlengeletano ya sweswinyana lowu a wu khomeriwile emugangeni wa ka Maphophe, Meyara Shadrack G Maluleke wa Masipala wa Muganga wa Collins Chabane u vulavule hi swivilelo swa vaaki na ku avelana makungu ya nhluvukiso wa nkarhi lowu taka eka ndhawu ya wadi 30.

Yin’wana ya tinhlokomhaka leti ku buriweke ha tona a ku ri ku akiwa ka makete eSaselamani, ku fana na leswi kumekaka eka madoroba man’wana endzeni ka masipala. Khombo ra kona, phurojeke leyi a yi kotanga kuhumelela hi laha Masipala a wu languterile ha kona.

Meyara wa Collins Chabane Shadrack Maluleke u vurile leswaku, ” Phurojeke ya timakete a yi kotangi kuhumelela tanihi leswi, hi nga kala ndhawu yo aka kona,” a ku vula Meyara wa Collins Chabane Shadrack Maluleke a kha a hlamula xivutiso xa muaka tiko wa wadi 30.

Meyara Maluleke u tiyisisile vaaki leswaku u ta burisana na varhangeri va ndhawu ku kuma ndhawu leyi ringaneleke timakete. U kandziyisile nkoka wa ku va na tindhawu ta timakete tanihi leswi tiendlaku leswaku yi languteka yi basile.

Masipala wu tiyimiserile ku nyika switirhisiwa leswi lavekaka ku seketela mabindzu ya laha kaya na ku tlakusa ku kula ka ikhonomi.
Ku ya emahlweni, Meyara Maluleke u tivise leswaku varhangeri se va va nyikile ndhawu yo aka xidorobana xo xonga eSaselamani. Nhluvukiso lowu wu languteriwaka ku tisiwa eka Vaaki hi Masipala wu ta katsa ku akiwa ka magondzo ya ‘Ring road’.

“Tiphurojeke ta ku akiwa ka ti-Ring Road taha languteriwile ku ya emahlweni emugangeni wa Hosi Mhinga tanihi leswi tiyaku emahlweni eBotsoleni na muganga waka Josefa,” Kuvula Meyara Maluleke. Loko a ya emahlweni u vurile leswaku, “Masipala wu ta katsa miganga yin’wana ya wadi 30 eka lembe ximali leri taka, ku tiyisisa ku antswisiwa ka mfikelelo na vuhlanganisi eka vaaki hinkwavo.

Loko a vulavula hi mhaka ya mphakelo wa mati, Meyara Maluleke u boxe leswaku matshalatshala ya le ku endliweni ku ndlandlamuxa sisiteme ya mati eSaselamani na le ka Xikundu. “Loko se yi hetiwile, vaaki va nga langutela mphakelo wa mati lowu tshembekaka na lowu nga cincekiki karhi na karhi”.

“Ku engetela kwalaho, masipala wu le ku tirheni hi matimba ku nghenisa gezi eka vaaki vantshwa eSaselamani”, ku vula Meyara Maluleke hi ku tinyungubyisa. u yile emahlweni a vula leswaku “ku hava na un’we wa vaaki va khale loyi a nga riki na gezi ehansi ka Masipala wa Collins Chabane hi nwitivaka”.

Ku tinyiketela ka meyara ku lulamisa swivilelo swa vaaki na ku fambisa nhluvukiso eka Masipala wa Collins Chabane swa vonaka. Hi tipulani ta / Makungu ya swivumbeko swa makete, switirhisiwa swa magondzo leswi antswisiweke, mati, vuhlanganisi na swin’wana, masipala wu tinyiketerile ku korhekela vaaki.

Hi ku tirhisana na varhangeri va miganga na vaaki, Meyara Maluleke u kongomisa ku hetisisa switshembiso leswi na ku tiyisisa vumundzuku byo vangama eka miganga ya wadi 30 hambi kuri Masipala hiku angarhela.