Ku Pona eka Nguva Ya Ndzingo Wa Ku Tirhisa Mali

Loko lembe ri ri karhi ri fika emakumu, na nguva ya ndzingo wo heta mali ya tshinela. Ku suka eka Black Friday ku ya eka minkhuvo ya tiholideyi, ntshikilelo wo tirhisa mali ku tlula mpimo i wukulu swinene. Hambiswiritano, hi vutivi byintsongo na ku pulana, swa koteka ku hundza eka nguva leyi handle ko wela eka ntlhamu wa ku tirhisa mali u nga rhangangi u swi hlela.

Eka hungu leri, hi ta lavisisa swilo swa psychological factors leswi nga endlaka leswaku u tirhisa mali hi vusupfa naswona Mutivi wa swa Miehleketo Zipho Mhlongo u nyikile switsundzuxo leswi u nga switirhisaka no tlhela swi ku pfuna eka ku hlayisa mali hambi ku ri ku endla swiboho leswinene hi Mali ya wena.

Mutivi wa miehleketo Zipho Mhlongo u tshikelerile nkoka wo hambanyisa leswi lavekaka na swilaveko. “I swa nkoka swinene ku kambela mpimanyeto wa wena hi xikongomelo na ku rhangisa swilo swa nkoka ku tlula swilo swo ka swi nga ri swa nkoka”.
Loko Mhlongo a ya emahlweni u ringanyetile leswaku vanhu vafanele ku lava mpfuneto wa xiphurofexinali loko va hlangana na ku tikeriwa loko swita eka ku lawula ku tirhisa mali hi xihatla.

Hakanyingi vatswari vo tala va titwa va boheka ku nyika vana va vona mali hi minkarhi leyi ya makhisimusi. Hambiswiritano, i swa nkoka ku dyondzisa vana hi nkoka wa mali, leswaku va ta kota ku endla swilo leswi vonakaka.
Hi ku veka mindzilakano leyi tiyeke ni ku rhangela hi xikombiso, vatswari va nga sirhelela vana va vona leswaku va nga weli entlhan’wini wa ku tirhisa mali ku tlula mpimo enkarhini lowu taka.

Nkarhi wa tiholideyi wu fanele wu va wa ku tumbuluxa mintokoto leyi nga ni nhlamuselo ematshan’weni yo kuma swilo. Mhlongo u khutaza vanhu ku kongomisa karhi wa tiholidayi eka varhandziwa va vona handle ko tirhisa mali loko swi nga bohi. “A swi bohi leswaku u xavela varhandziwa wa wena tinyiko to durha ngopfu, loko mali yi nga ri kona ringeta ku tshama hansi na vona,” ku vula Mhlongo.

Xinwana lexi nga pfunaka vanhu leswaku va papalata ku tirhisa mali ku tlula mpimo, i kunguhata ka ha ri na karhi naswona va fanele ku ntshama va vekile tihlo eka macheleni ya vona.

“Minxavo yi tala ku tlakuka hi nguva ya makhisimusi, hikwalaho ku hakela mali leyi lavekaka ka ha ri emahlweni swi nga pfuna ku papalata ku durha loku engetelekeke,” ku vula Mhlongo. Ku engetela kwalaho, “i swa nkoka swinene ku va ni vuxiyaxiya eka vukanganyisi bya vugevenga tanihi leswi byi nga tala ngopfu hi nkarhi lowu.”

“Vanhu vafanele Ku tidyondzisa hi vuhlayiseki bya le ka Internet, leswaku va ta kota ku papalata ku xava eka mavhengele ya vuxisi hambi ku ri ku avelana rungula ra xihundla [nomboro ya khadi] ra nkoka na swingevi” ku ngimeta Mhlongo.

Tsundzuka leswaku ntsako wa xiviri wa nguva ya Makhisimusi wu le ka minkarhi leyi u avanelaka na varhandziwa va wena, ku nga ri eka swilo leswo heta mali.