Ku Tirhisa Thekinoloji hi Ndlela leyi nga hi vuyerisaka
Emisaveni ya namuntlha leyi cincaka hi xihatla, thekinoloji yi hoxa xandla swinene eku vumbeni ka vutomi bya hina ni mbango lowu hi rhendzeleke. Vaaki kusuka emigangeni ya ka Malamulele, eXifundzeni xa Limpopo, va na nkateko wa ku tirhisa thekinoloji hi ndlela leyi va nga ha vuyeriwaka ha yona.
Dokodela Nomsa Mkhize, mutivi wa thekinoloji wa ndhuma loyi a twisisaka swinene xiyimo xa ndhawu ya le makaya, u tshemba leswaku “thekinoloji yi nga va xitirhisiwa xa matimba eku lulamiseni ka mintlhontlho ya mbango na ku tlakusa maendlelo lama nga ta tshama nkarhi wo leha eka vaaki va Malamulele.”
1. Switshuxo swa Eneji leyi Pfuxetiwaka:
Malamulele yi kumeka endhawini leyi dyambu ri hisaka swinyawula, leswi endlaka leswaku eneji ya dyambu yi va ndlela leyi nga ha tirhisiwaka eka vuhumelerisi bya gezi. Dokodela Mkhize u vurile leswaku “mfumo wu fanele ku veka tiphaneleni ta solar [solar panel] eka miako ya mfumo kufana na le swikolweni, hambi ku ri tisenthara ta vaaki”.
Leswi a swi nga ta hunguta ntsena ku titshega hi mafurha ya fossil kambe swi ta tlhela swi hunguta ku durha ka gezi na ku tumbuluxa swivandlanene swa mitirho ya laha kaya.
2. Vulawuri bya Mati lebyinene:
Ku kayivela ka mati i mhaka leyi fambaka emahlweni eka swifundzha swo tala laha tikweni. Dokodela Mkhize u kandziyisa nkoka wo tirhisa tisisiteme letinene ta vulawuri bya mati leti tirhisaka ‘sensors’ na vuxopaxopi bya datha ku langutisisa matirhiselo ya mati, ku kuma ku ndhawu yo pfuta, na ku antswisa maendlelo ya ku cheleta.
Thekinoloji leyi yinga pfuneta ku hlayisa switirhisiwa swa mati naku tiyisisa ku hangalasiwa ka mati hindlela leyinene.
3. Internet of Things (IoT) ya ku Langutisisa Ntivo-mbango:
Inthanete ya Swilo (IoT) yi kombetela eka netiweke ya switirhisiwa leswi hlanganisiweke leswi nga hlengeletaka na ku cincana hi datha. Dokodela Mkhize u ringanyeta ku tirhisa thekinoloji ya IoT ku langutisisa tipharamitha ta mbango to fana na khwalithi ya moya, ku kufumela ka misava, na swiyimo swa maxelo.
Datha leyi yi nga nyika vutivi bya nkoka eka ku teka swiboho na tisisiteme ta xitsundzuxo xa le mahlweni, ku endla leswaku vaaki va kota ku hlamula hi ndlela leyinene eka mintlhontlho ya mbango.
4. Dyondzo ya Xidijitali na ku Lemukisa:
Dokodela Mkhize u kandziyisa nkoka wa dyondzo ya xidijitali na matshalatshala yo lemukisa ku nyika matimba eka vaaki hi vutivi na vuswikoti lebyi fambelanaka na thekinoloji na ku kondletela.
Leswi swi nga katsa tiwekhixopo eka ku tirhisa switirhisiwa leswi tirhisaka eneji hi ndlela leyinene, switirhisiwa swa inthanete swa maendlelo lama nga ta tshama nkarhi wo leha, na tipulatifomo ta xidijitali to avelana switori swa ku humelela na maendlelo lamanene.
Thekinoloji yi na vuswikoti byo hundzula ndlela leyi hi langutanaka na mintlhontlho ya mbango na ku tlakusa maendlelo yo tshamiseka eka vaaki va ka Malamulele. A hi tirhiseni matimba ya thekinoloji ku hlayisa ku saseka ka ntumbuluko ka Malamulele na ku tumbuluxa ndhawu leyi humelelaka eka tinxaka leti taka
