Ntsumbu Lowu Boleke wu Kumiwile eka Sawege ra Thyaka eXikolweni xa le Henhla xa Photani
MALAMULELE – Ntlawa wa vadyondzi vo huma exikolweni xa le henhla xa Photani emugangeni wa ka Mulamula, ehandle ka Malamulele, va vonile Mhangu yo chavisa leyi nga kavanyeta siku ra vona, leswi swita enzhaka ka ku kumiwa ka ntsumbu lowu a wu papamala endzeni ka sawege ra le xikolweni.
Mhangu leyo chavisa yi humelerile hi Ravuntlhanu lowu hundzeke nimixo (28 Mawuwana), loko ntlawa wa vadyondzi va ri karhi va lulamisela ku ya eka Event ya ndzhavuko leyi yinga tava Kona kungari khale.
“Loko hi ri karhi hi ncina, van’wana va vadyondzi, va ye va yima ehenhla sawege, tanihi leswi sawege a yi pfulekile nyana leswi swi va susumetele ku navela ku languta endzeni ka sawege ya thyaka,” ku vula Muchundeni wa ka Giredi ya 12, loyi a nga vula leswaku a nga lavi vito ra yena ri boxiwa.
“Swiva hlamarisile swinene ku vona ntsumbu lowu boleke, wu kha wu papamala endzheni ka sawege ra thyaka,” a engeta.
“Loko hi huwelela, swichudeni swin’wana na swona swi tile swi ta languta. A hi ri na ku chava ku kulu. Van’wana va hina a hi fanele ku tsala xikambelo xa Geography siku rero, leswi a swa ha kotekanga endzhaku ka leswi hi swi voneke,” ku vula yena.
Hi Musumbhunuku nimixo (31 Mawuwana), vadyondzi va kumile vutshunguri bya swa miehleketo ku suka eka mutivi wa miehleketo na swirho swa Foramu ya Vafundhisi etikweni.
Tatana Justice Mashaba, xirho xa Huvo yo Lawula Swikolo (SGB), u kombisile ku chava ka yena eka ku kumiwa ka ntsumbu exikolweni, naswona u vula leswaku mhangu leyi yi va siye na swivutiso swo tala.
Kuya hi muvulavuleri wa maphorisa ya Limpopo, Col Malesela Ledwaba, swirho swa Search and Rescue Diving Unit swi hatle swi vitaniwile endhawini ya mhangu. “Va swi kotile ku humesa ntsumbu lowu, naswona rimbewu ra ntsumbu a ri se tiveka tanihi leswi ntsumbu awu sungurile ku bola,”.
Ledwaba u yile emahlweni a vula leswaku, “Vulavisisi bya maphorisa byi ya emahlweni”.
Sweswi ntsumbu wu hlayisiwe evuhlayiselweni bya mintsumbu bya mfumo eGiyani, laha ku nga ta endliwa vukamberi bya rifu, leswaku ku ta kumiwa xivangelo xa rifu.
Eka karhi wa sweswi vuxokoxoko bya mufi na byona a byi se tiveka hambi kuri ndyangu wa yena.
