Matimba Ya Vuyimbeleri Bya Xitsonga Hi Nhenha Mayanda
Mimpfumawulo ya vuyimbeleri bya Xitsonga i khale yi ri xiphemu xa nkoka eka ndhavuko wa Vatsonga, naswona vuyimbeleri lebyi byi tirha tanihi xihlovo xa ntsako, ku tlangela hambi ku ri ku hundzisa rhungula ro karhi.
Muyimbeleri Given Mabasa loyi a tivekaku tanihi Mayanda, u vile na nkucetelo eka vuyimbeleri bya Xitsonga ku tlula khume ntlhanu (15) wa malembe. Vuswikoti bya yena byi n’wi endle a xiximika swinene na ku tsakeriwa hi varhandzi va vuyimbeleri bya Xitsonga.
Tialibamu ta Mayanda ta khale a ti kombisanga ntsena vuswikoti bya yena byo hlawuleka tani hi muyimbeleri na mutsari wa tinsimu, kambe ti tirhile tani hi pulatifomo yo hlayisa ndzhaka leyi fuweke ya ndhavuko wa Vatsonga.
Mayanda, u endle vuyimbeleri byo hambana-hambana, naswona Marito ya yena ya tala ku nghenelela eka tinhlokomhaka ta, ndzhaka, timhaka ta ntshamisano, na mintokoto ya siku na siku ya vaaki va Afrika-dzonga.
Loko varhandzi na Vaseketeri va Mayanda va rindzele hi mahlo-ngati ku humesiwa ka alibamu ya yena ya vu 19, Mayanda u vurile leswaku “Alibamu ya Zolabud no19 yi ta humesiwa hi nhweti ya ndzhati.”
“Alibamu ya Zolabud no 19 leyi nga thyiwa leswaku Gome ra vuhumbu yita huma hi ti 23 ndzhati 2023, naswona hi siku leri hi tava hi kha hi tlangela Matshwa-Day eka Mhinga,” KU vula Muyimbeleri Mayanda.
Mayanda u tlherile a vula leswaku “Alibamu yitava yikhome tisimu ta khume mbirhi (12) to fana na Gome ra Vuhumbu, Boyfriend, Malebvu ya Mbuti na tinwani totala.”
Loko Mayanda a ya emahlweni u hlamuserile leswaku Alibamu leyi u yi tirhile na Navigator, Vhimbha Mkwama, Tabyamela na Madya Swohisa, xikanwe na Mabevani na Eric Chauke.
Ku tinyiketela ka Mayanda eka vuyimbeleri na ku hlayisa ntiyiso wa vuyimbeleri bya Xitsonga a swi se tshama swi tsekatseka, kuza a kotile ku tirha tialibamu ta 19, naswona u kombisa leswaku ka Alibamu ya sweswi ku tava na ku hambana nyana loko ku fana nisiwa na tialibamu ta yena ta karhi lowu wu nga hundza.
“Xinwana hi leswaku ku na kuhambana ka Alibamu leyi nati tialibamu letinwani tanihi leswi ka alibamu leyi kutava na tinsimu leti tingata sumiwa hi munhu wa xisati,” ku vula Mayanda.
“Ndza tshembisa Vaseketeri va mina, leswaku tinsimu leti tingatava ka alibamu leyi titava ncinisa swinene,” ku engeta Mayanda.
“Kambe kungevi na leti to ncinisa tsena, na leti vanhu va ndzi tivaka hitona ndzi hlaya tinsimu leto Dyondzisa, tovava hambi kuri to chavelela, ti tava Kona.” Ku ngimeta Mayanda.
Mayanda u ngimetile mburisano wa hina hiku hundzisa xitiviso xa leswaku hiti 16 N’wendzamhala 2023 vatava na event leyi kulu ya Mayanda na Vanghana Music festival, eka Mhinga eNdhawini yo hlatshwela timovha ya Mabanana.
