Phorisa Nyalunga a aleliwa Bayili
HAZYVIEW – Ndzawulo ya vuhlayiseki bya vaaki, vuhlayiseki, na vuhlanganisi bya le Mpumalanga yi kombisile ku vilela hi ku khomiwa ka Khanyisile Viola Nyalunga, Phorisa ra le magondzweni loyi a thoriweke hi ndzawulo leyi.
Nyalunga, wa le Mbombela wa malembe ya makume mbirhi kaya [29] u henhliwa hi kuva a nghenelerile eka nandzu lowu fambelanaka na ku yiviwa ka Mali (CIT) eHazyview, kambe a ku humelelanga.
Hi ku ya hi Muvulavuleri wa ndzawulo ya vuhlayiseki bya vaaki, na vusirheleri eMpumalanga, Moeti Mmusi u vula leswaku Hi nkarhi wa vulavisisi, mimovha yo yiviwa leyi ku tshembiwaka leswaku yi tirhisiwile eka vugevenga lebyi yi kumiwile yi pakile ejarateni ra Nyalunga.
“Ku kumiwa ka mimovha ejarateni ra Nyalunga swi endli leswaku a khomiwa, hi swihehlo swa ku ringeta ku yiva Mali [CIT],” ku vula Muvulavuleri wa Ndzawulo Moeti Mmusi.
Mahungu ya ku khomiwa ka Nyalunga ya rhumele magandlati yo chavisa eka vaaki hinkwavo.
Muvulavuleri wa ndzawulo Moeti Mmusi u vula leswaku hambi leswi va nga tsakelaka ku vulavula hi mhaka leyi, swihehlo leswi swa va vilerisa tani hi leswi swi khumbaka ku tshembheka ka vatirhela-mfumo va nawu.
“Ndzawulo yi amukela ku khomiwa ka muehleketeleriwa; hambiswiritano, hi ta yimela maendlelo ya khoto ya hela hi nga si teka swiboho swihi na swihi,” ku vula Mmusi.
Nyalunga u aleriwile beyili hi khoto ya majistarata ya White River hi Ravunharhu, naswona nandzu wa yena wu hundziseriwe emahlweni ku ya ka ti 27 ta ndzhati 2023, tanihi leswi vulavisisi bya Maphorisa byi yaka emahlweni.
