Thlothlokwe Golden Syrup FC yi ya yi mbombomela
Hi Orlando Chauke
Hambi leswi a xi tlanga ekaya, erivaleni ra mintlangu ra Mamanyoha emugangeni wa Mamanyoha, xipano xa Thlothlokwe Golden Syrup FC a xi swi kotanga ku tirhisa xiyimo lexi. Xi hluriwile hi 1-0 hi White Vultures eka ntlangu wa Mugqivela wa ti 24 Sunguti 2025
Ku lahlekeriwa loku i ku tlhelela endzhaku kun’wana eka xipano lexi a xi ri eku tsandzekeni ku sukela loko nguva yi ta va yi sungurile, leswi engetelaka ku vilela hikwalaho ka matirhelo ya vona yo biha. Vuyelo bya vona byo biha lebyi yaka emahlweni byi siye vaseketeri va vona vo tshembeka va titwa va khunguvanyekile swinene.
Xipano lexi sweswi hi xona ntsena eka ligi ya ABC Motsepe Stream A lexi nga si hlulaka eka ntlangu ni wun’we ku sukela loko nguva yi sungula lembe leri nga hundza. Ku langutela a ku ri ehenhla eku sunguleni, kambe vhiki rin’wana na rin’wana leri hundzaka, swi ya swi vonaka leswaku va tsandzeka.
Xiyimo xa vona xa vilerisa, naswona swi vonaka swi nga koteki leswaku va gonya va ya ehenhla. Leswi ku nga na tinhla timbirhi ntsena eka mintlangu ya 11 leyi tlangiweke ku fikela sweswi, xiyimo xa xipano xi ya xi nyanya ku biha. Eka nkarhi lowu, minkarhi ya vona yo papalata ku susiwa yi le hansi swinene, naswona ku antswisiwa lokukulu ku vonaka ku nga ta endleka.
Xipano lexi xi le kusuhi no va xo sungula ku tshika ligi, handle ka loko hi ndlela yo karhi xi nga sungulaka ku hlula eka mintlangu yo hetelela—nchumu lowu vonakaka wu nga ta endleka hi ku ya hi matirhelo ya xona ya sweswi. Leswi ku nga riki na ku hlula endzhaku ka mintlangu ya 11 na swiphiqo leswi yaka emahlweni eka vusirheleri na nhlaselo, langutelo ra nguva hinkwayo ri languteka ri nga ri kahle swinene.
Eka vatlangi, vumundzuku bya vona na Thlothlokwe Golden Syrup FC a byi tiyiseki, swi ti komba onge va nga lahlekeriwa hi mintirho ku nga ri khale. Eka ntlangu wun’wana na wun’wana, ntshembo wa vona wo tshama eka ligi wu ya wu tsana.
Xipano xi lava ku cinca lokukulu hi xihatla eka maqhinga, vatlangi, na moya wa xipano loko xi tshemba ku hundzula swilo no papalata ku susiwa. Eka varhandzi va masipala wa Greater Letaba, minkarhi yo va na xipano eka ABC Motsepe League ya hatla ya nyamalala. Handle ka loko xipano xo vuyelela xi tirha hi ku hiseka, va nga ha va va nga ri na xipano nkarhi wo leha. Swi nga teka malembe leswaku xipano xin’wana xi hluvuka ku ya eka xiyimo xa ABC Motsepe.