Timpfula ti tisa nxungeto wa Dari
Hi Ntsakisi Gracia Chauke
Ndzawulo ya Rihanyo ya xifundzhankulu xa Limpopo yi lemukisa vanhu hi khombo lerikulu ra vuvabyi bya Dari endzhaku ka timpfula ta matimba. Ku vuriwa leswaku loko mpfula yi pfuneta vurimi na mphakelo wa mati, yitlhela yi endla leswaku tinsuna ti tswalana no kula hi ku hatlisa, leswi engetelaka khombo ra vuvabyi bya Dari.
Eka pheji ra xiyenge xa mabulo xa Facebook, ndzawulo yi vike leswaku: “Dari i vuvabyi lebyi nga ni khombo lebyi hangalasiwaka hi tinsuna to karhi. Kasi Swikombiso swa kuva munhu a khomiwe hi vuvabyi lebyi swi katsa ku hisa ka miri, ku pandza ka nhloko ni ku vava ka miri, hi ntolovelo swikombiso swi tala ku vonaka endzhaku ka masiku ya khume ku ya eka khume ntlhanu endzhaku ko lumiwa. Loko byi nga tshunguriwi hi ku hatlisa, vuvabyi bya Dari bya dlaya.”
Hi ku ya hi ndzawulo, n’waxemu xifundzhankulu xa Limpopo xi vile na 557 wa timhangu ta Dari na mafu manharhu. Loko ku pimanisiwa na malembe lama hundzeke nhlayo yi chikile, kambe xifundzhankulu xa ha ri ekhombyeni, ngopfu-ngopfu endzhaku ka timpfula. Ku pfuneta ku yimisa vuvabyi bya Dari, ndzawulo yi vile yi fafazela makaya ku dlaya tinsuna, laha tindlu ta kwalomu ko tlula 1.16 wa mamiliyoni ti nga kuma vukorhokeri byo fafazela. Lembe leri taka, nongonoko lowu wu ta kula, laha vatirhi va 400 va nga ta fafazela tindhawu tin’wana ku nga si fika nguva ya ku tala ngopfu ka tinsuna hi N’wendzamhala.
Swa ha te tano, Vaaki va hlohloteriwa ku pfuneta hi ku pfumelela vatirhi va rihanyo ku fafazela makaya ya vona, ku tirhisa swidlaya-switsotswana, ku ambala swiambalo swo leha nivusiku, na ku etlela ehansi nete ya tinsuna. Lava va yaka etindhawini leti nga ni timhangu ta Dari va fanele va nwa mirhi yo sivela. Un’wana ni un’wana loyi a titwaka a vabya endzhaku ko endzela tindhawu to tano u fanele a lava mpfuno wa vutshunguri hi ku hatlisa naswona a tivisa madokodela hi matimu ya yena ya riendzo.
Ndzawulo ya Rihanyo ya xifundzhankulu xa Limpopo yi tshama yi tiyimiserile ku lwisana na vuvabyi bya Dari, kambe ntirhisano wa vaaki i wa nkoka swinene.