Muganga wa Shitlhelani, lowu kumekaka ehandle nyana ka Malamulele, wu ya emahlweni na ntirho wa wona wa lembe na lembe ku khutaza vadyondzi.
Muganga lowu wu simeke Nkwama wa Shitlhelani Education Trust Fund, lowu nga na malembe yo hlaya wu ri karhi wu tirha, wu ndlandlamuxa dyondzo eka ndhawu leyi na ku hlohlotela machudeni ku humelela.
Hi Mugqivela, 25 Sunguti 2025, Shitlhelani Education Trust Fund hi ku tirhisana na Hosana ya muganga va khomile ntirho eholweni ya vaaki ya Gezani George Shitlhelani ku tlangela ku humelela ka tlilasi ya matiriki ya 2024. Ntirho lowu a wu ngheneriwile hi Cllr. Faith Chauke loyi a yimele Meyara wa masipala wa Collins Chabane Cllr. Shadrack Maluleke, Mukhanselara wa Wadi Tatana Chabalala KR, vadyondzisi, vadyondzi, Ndyangu wa Vuhosi bya ka Shitlhelani, vatswari, na Profesa Babane ku suka eYunivhesiti Venda.
Man’wana ya masagwadi lawa a ya nyikiwa vadyondziHosana ya muganga wa Shitlhelani na un’wana wa vadyondzi lava tirheke kahle hi nkarhi wo nyikela masagwadi
Machudeni lawa ya nga pasa kahle lawa humaka emugangeni, ku nga khathariseki xikolo lexi a va dyondza eka xona, ya amukele switifikheti, kasi lava paseleke ehenhla swinene va nyikiwile na masagwadi ya mali. Swa ha te tano, loyi a paseke ku tlula hinkwavo emugangeni u amukele na ‘laptop’. Vadyondzi va xikolo xa le hansi xa Langutani lava paseleke ehenhla na vona va nyikiwile masagwadi.
Un’wana vadyondzi va xikolo xa le hansi xa Langutani a amukela masagwadi
Profesa Morris Thembhani Babane ku suka eYunivhesiti ya Venda u nyikerile mbulavulo wa nkoka, a khutaza vadyondzi ku tirha hi matimba no tiyimisela.
U va tsundzuxe leswaku vutomi bya le yunivhesiti byi hambanile swinene ni bya le xikolweni xa le henhla naswona u khutaze vadyondzi leswaku va hlawula vanghana va vona hi vutlhari, tanihi leswi van’wana va nga va hambukisaka. “Ku humelela evuton’wini swi lava ku tiyimisela ni ku tirha hi matimba,” ku vula Babane. “Loko ma ha kongoma eka dyondzo ya le henhla, tsundzukani leswaku yunivhesiti i ntokoto lowu hambaneke hi ku helela, naswona vanhu lava u nga hlanganaka na vona va nga va ni nkucetelo lowukulu eka vumundzuku bya wena,” a engetela.
Profesa Babane ku suka eYunivhesiti ya Venda hi nkarhi wo nyika mbulavulo
Hosana ya muganga u kombisile nkoka wa dyondzo eku tlakuseni ka vaaki naswona u tshembisile ku ya emahlweni a seketela xikolo xa Mahuntsi lexi kumekaka kwalahaya mugangeni. U tlhele a kombisa ku navelela ka yena lokunene eka vadyondzi va matiriki va 2024 loko va ha ta kongoma eswikolweni swa tidyondzo ta le henhla ku nga tiyunivhesiti na tikholichi. Ku engetela kwalaho, Xikolo xa le henhla xa Mahuntsi xi xixime vadyondzi va xona va 2024 lava nga tirha kahle swinene, laha loyi a paseke ku tlula hi hinkwavo a nga nyikiwa ‘laptop’.
Huvo leyi lawulaka xikolo xa le henhla xa Mahuntsi (SGB) yi tlhele yi kombela vatswari ku tiyisisa leswaku vana va vona va nghena xikolo xa le henhla xa Mahuntsi ku kuma dyondzo yo antswa. Khamphani ya Remm 77 Clinic Enterprise, leyi nga museketeri wa nkarhi wo leha wa xikolo xa Mahuntsi, yi amukerile nkoka wa ntirho wa Shitlhelani Education Trust Fund. “Hi na nkarhi wo leha hi tirha na xikolo xa le henhla xa Mahuntsi,” ku vula n’wini khamphani ya Remm.
“Hi tsakile ku vona mbuyelo lowunene wa Nkwama wa Dyondzo wa Shitlhelani. Ku ya emahlweni, hi lava ku va xiphemu lexikulu xa kungu leri naswona hi tshembisa ku nyikela hi swidlodlo na timendlele eka mintirho ya nkarhi lowu taka,” a engetela.
Ku tinyiketela ka muganga eka dyondzo ku tlhele ku kandziyisiwa tanihi leswi Remm yi tshembiseke ku nyikela hi swidlodlo kotara yin’wana na yin’wana ku lemuka vadyondzi lava tirhaka kahle swinene exikolweni xa le hansi xa Langutani. Ku vuriwa leswaku Shitlhelani na Shigamani hi yona ntsena miganga eka Masipala wa Muganga wa Collins Chabane leyi khomaka mintirho yo tano, leswi kombisaka ku tinyiketela ka yona eka dyondzo.
Muganga wa Shitlhelani wu ya emahlweni wu veka xiyimo xa le henhla xa ku nghenelela ka vaaki eka dyondzo, leswi kombisaka leswaku loko muganga wu hlangana hi xivono xin’we, swilo leswikulu swi nga humelela eka vadyondzi va wona.