Xiyimbeleri xi kandziyisa nkoka wa evhangeli

Share the News

 

 

Hi Ntsakisi Gracia Chauke

Xiyimbeleri xa evhangeli xa ndhuma Mahungu Phamela Chauke, loyi a velekiweke no kurisiwa emugangeni wa Magomani ehandle nyana ka Malamulele, u endla leswinene eka vunanga bya vuyimbeleri hi rito ra yena ra matimba na hungu ro hlohlotela.

Mupfumeri loyi tlhelo a nga xiyimbeleri, Mahungu u ponisiwile ari na malembe ya 12 kumbe 13 naswona u hatle a tshubula talenta ya yena yo yimbelela endzeni ka kereke ya yena.

Rirhandzu ra yena eka vuyimbeleri bya evhangeli ri kurile ntsena ku sukela kwalaho, naswona namuntlha i munhu wo tiveka swinene eka vuyimbeleri bya evhangeli.

Hi N’wendzamhala n’waxemu, Mahungu u humesile alibamu ya yena ya vunkombo, leyi vuriwaka Yehova U Kahle, leyi se yi nga koka rinoko ro tala. Risimu rin’wana ni rin’wana eka alibamu leyi ri ta ni nkandziyiso kumbe vhidiyo ya rona ya vuyimbeleri.

Alibamu leyi yi avelana riendzo ra yena na ripfumelo, leri hlohloteriweke ngopfu-ngopfu hi xiendlakalo lexi cincaka vutomi.

Mahungu u hlamuserile leswaku: “Hi lembe ra 2021, ndzi ve eka mhangu leyikulu ya movha na swirho swa mune swa ndyangu wa mina. A hi ri eka xiyimo lexi nga tsakisiki swinene, kambe hi ponile. Ntokoto wolowo wu ndzi kombe tintswalo ta Xikwembu ni ku ndzi tsundzuxa ndlela leyi xi veke kahle ha yona eka mina.”

Rin’wana ra tinsimu leti xiyekaka eka alibamu leyi, hi leri vitaniwaka “Hi lo tsetseleriwa,” risimu leri ri ve ra ndhuma swinene naswona ri ya emahlweni ri twala eka vayingiseri.

Mahungu u hlamusele leswaku hungu ra risimu leri ri vulavula hi tintswalo ta Xikwembu na nkoka wo tshemba pulani ya xona.

U vule leswaku: “Loko a ku nga ri hi tintswalo ta Xikwembu, a ndzi ta va ndzi nga ri kona namuntlha. Hinkwaswo leswi hi swi fikelelaka a hi hikwalaho ka matimba ya hina kambe hikwalaho ka ku rhandza ka Xikwembu. Hi laha namuntlha hikwalaho ka tintswalo ta Yena.”

Mahungu, loyi a kuleke a yingisela vayimbeleri vo hambana hambana va evhangeli, u kandziyise leswaku vuyimbeleri bya evhangeli byi na xiave xo hlawuleka eka vaaki.

“ Vunanga bya evhangeli byi vulavula ntiyiso. A hi vuhungasi ntsena; byi tisa ku horisiwa, nchavelelo ni ntshembo. Byi vulavula na mimoya ya vanhu naswona swi va pfuna ku tihlanganisa na Xikwembu,” a hlamusela.

Ehandle ka ntirho wa yena wa vuyimbeleri, Mahungu u tlhela a nghenelela eka tiphurojeke tin’wana. U tirha na Kenny Shivambu eka ntlawa vuyimbeleri bya evhangeli wa Go Explo, laha a lawulaka na ku yimbelela.

Ku engetela kwalaho, Mahungu u tlanga xiave xa nkoka eka vaaki va ka vona tanihi leswi a nga mudyondzisi exikolweni xa le hansi xa Magomani.

Loko vuyimbeleri bya yena byi ya emahlweni byi hlohlotela vo tala, Mahungu u kombise ku khensa eka vaseketeri va yena.

“Ndza khensa swinene eka un’wana na un’wana loyi a tshamelaka ro ndzi seketela. Ndzi kombela mi ya emahlweni mi seketela no tshama mi pfumela eka leswi Xikwembu xi swi endlaka hi vuyimbeleri bya mina,” ku vula yena.

Hi hungu ra yena ro tlakusa na ripfumelo leri nga tsekatsekiki, Mahungu u le ku kombiseni leswaku vunanga bya evhangeli a byi hlohloteli ntsena kambe byi na matimba yo horisa no tlakusa miganga.

 

 

 

 

 

 

 

 

 

 

 

 

 

 

 

 

 

 

 

 

Mathunse Hlukani

Hlukani Mathunse is a talented journalist and media professional with a passion for storytelling and community engagement.

Mathunse Hlukani has 369 posts and counting. See all posts by Mathunse Hlukani

Leave a Reply

Your email address will not be published. Required fields are marked *