Hosi yi hlohletela dyondzo.
Benson Ntlemo
“A hi nyiki hi ku hi na swona, kambe hi nyika hikuva ripfalo ri hi byela swona.”
Lawa i marito ya Hosi Bohani Shigamani, Loko a vulavula eka ntirho wo lelana na vana vanharhu lava nga tirha kahle exikolweni xa le henhla xa Shigamani.
Ntirho lowu wa lembe na lembe wu tlhela wu tirhisiwa ku hlohletela vana lava va nga ka Ntangha khume lembe leri.
Eka ntirho lowu a wu endleriwa exikolweni xa le henhla xa Shigamani, Hosi Shigamani u kombisile ku tsaka hi mbuyelo wa pfhumba leri.
“Ku sukela loko hi sungurile ku na ku antswa ka mbuyelo wa xikolo lexi kutani hi khensa tikomiti ta tiko na vanwani lava pfunetaka.
Lembe leri nga hundza mbuyelo a wu ri 62,1 wa tiphesente, kambe sweswi wu gonyile, wu fika ka 85,5 wa tiphesente,” ku vula Hosi Shigamani.
U yile mahlweni a hlamusela leswaku mfumo xivongo wa ka Shigamani, ku katsa na huvo yo fambisa xikolo, na khirexe ya Tlharihani Shigamani, varhangeri va tiko ku katsa, khaphani ya REMM, Mabongani Business Enterprise na Dr Gulukhulu Mathebula va hlengeletile mali yo ringana R20 000 na laptop ku sula nyuku vana vanharhu lava nga tirha kahle.
Nsovo Mabasa loyi a nga khoma xiyimo xo sungula u kumile ntsengo wa R10 000 na laptop, Theron Maluleke u kumile R6 000, kasi Vukona Maswanganyi u kumile R4 000.
Hosi Shigamani u vurile leswaku leswi va swi endlaku i ku sula nyuku lava nga tirha kahle, leswi swi nga ta hlohletela vanwani ku tirha hi khikhi.
“A hi nyiki hi ku hi na swona kambe hi kombisa ku tinyiketela ka hina tani hi tiko, ku seketela dyondzo,” ku vula Hosi Shigamani.
Dokodela Gulukhulu Mathebula, loyi a nga mutshami wa xitulu wa Congress of Traditional Leaders of South Africa eVhembe, laha Hosi Shigamani anga matsalani, u kombisile ntsako ku vona Hosi Shigamani na tiko va twanana ku seketela dyondzo ya vana.
Dokodela Mathebula hi unwani wa lava va nga tshambunula swandla ku endla leswaku tirho wu humelela.
“Ntirho lowu, Hosi Shigamani na tiko mi wu endlaku wa xiximeka. Ndzi navela onge miganga hikwayo yi nga endla leswi mi swi endlaku,” ku vula dokodela Mathebula.
Tanana Reuben Makamu, loyi a nga nyikela laptop hi ku yimela khaphani ya REMM u kombise ku nyanyuriwa hi ntirho lowu.
U vurile leswaku u ta xava titrofi ku endla leswaku xikolo xi fundha vana lava tirhaku kahle kotara yinwani na yinwani.
Loko a yimela machudeni kuloni Nsovo u vurile leswaku wa tinyungubyisa ku vona varhangeri va tikarhatela vona.
“A hi nga mi nyumisi laha hi ya ka kona hi ta endla leswaku vanhu hinkwavo va hlonipha tiko ra ka Shigamani,” ku vula Nsovo.