“ku katsiwa eka khalendara a swi nyiki vuhosi ku va enawini”

Hi Orlando chauke

Ku ringana malembe, varhangeri va ndhavuko eka Greater Giyani hinkwayo va langutane na mintlhontlho hikokwalaho ka ku pfumaleka ka ku amukeriwa hi ximfumo kusuka eka mfumo wa miganga, hambi leswi va xiximiwaka no amukeriwa hi miganga ya vona. Masipala wu amukerile ntsena varhangeri va ndhavuko va khume, wu va nyika mfikelelo wo hlawuleka eka minhlangano ya nkoka, ku teka swiboho, na switirhisiwa swa masipala. Hikwalaho ka sweswo, varhangeri van’wana vo tala va titwe va honisiwa naswona va nga swi koti ku yimela swilaveko swa vanhu va vona.

Ku tshikiwa ka varhangeri lava swi vange ku vilela na ku hlundzuka hikuva a va vona onge va honisiwa hikokwalaho ka tipholisi ta khale kusuka eka minkarhi ya xihlawuhlawu. Votala va vona a va tshemba leswaku ntirho wa vona wa nkoka eka vulawuri awu honisiwa, leswinga va sivela ku yimela kahle miganga ya vona.

Ntirho wa vona wo tika wu hetelele wu humelerile, tanihi leswi Masipala wa Greater Giyani sweswi wu va engeteleke eka khalendara ya wona ya ximfumo. Leswi i ku cinca lokukulu, tanihi leswi varhangeri lava sweswi va rhambiwaka eka minhlangano ya nkoka no nyikiwa nkarhi wo va xiphemu xa swiboho swa masipala.

Nhluvukiso lowu wu tekiwa ngopfu tanihi ku hlula lokukulu exikarhi ka varhangeri va ndhavuko lava ku nga khale va ariwa ku amukeriwa hi mfumo ximfumo. Ku ringana malembe, va lwela ndhawu ya vona leyi faneleke eka timhaka ta masipala, naswona ku katsiwa ka vona sweswinyana eka Greater Giyani swi voniwa tani hi goza ro lerinene.

Ku hlamula eka mhaka leyi ya nkoka, vaseketeri va varhangeri lava va rhumele swiviko eka Facebook ku kombisa ntsako. Swiyenge swa mabulo swi tele hi swiviko swo tlangela, laha vaseketeri van’wana va nga avelana swifaniso leswi tekiweke swa varhangeri va vona eka masipala.

Loko a komberiwa ku hlamusela ku katsiwa ka varhangeri lava va ndhavuko sweswinyana eka khalendara ya masipala, muvulavuleri wa Masipala wa Greater Giyani, Steve Mavunda u boxe leswaku ku katsiwa ka vona a ku na mhaka na xiyimo xa vona xa vuhosi. U hlamuserile leswaku masipala a wu lulamisa ntsena xihoxo lexi endliweke loko varhangeri lava eku sunguleni va tshikiwile, ematshan’wini yo va nyika ku amukeriwa kwihi na kwihi ka ximfumo tanihi valawuri va ndhavuko.

“Vonani, hi engeterile Hosi Khakhala na Hosi Maswanganyi eka khalendara endzhaku ko swi vona leswaku ku va tshika ehandle a ku ri xihoxo. Xiboho xa hina a xi fambelani na timhaka tihi na tihi leti va nga na tona na xiyimo xa vona xa vurhangeri bya ndhavuko. Loko ku ri Hosi Siyandhani, hi tshamela ro n’wi katsa eka dayari ku sukela loko a tiviwa hi Holobyenkulu,” ku vula Mavunda.

Loko a vutisiwa hi ku cinca loku, Hosi Khakhala, un’wana wa varhangeri va ndhavuko loyi khale a tshikiwile ehandle, u swi amukerile tanihi goza lerinene. U te: “Leri i goza leri yaka eka ndlela leyinene hikuva minkarhi hinkwayo a hi ringana.”

“Sweswi ndzi kuma muholo ni swipfuno leswi a hi ariwa swona khale. Ndza tsaka leswaku mfumo wu hetelele wu lemukile vukona bya hina na ku ringana na varhangeri van’wana va ndhavuko. A swi nga lulamanga eka hina,” a engetela.