Meyara a byela swirho swa SGB ku lwisana na vukungundwana
Hi Orlando Chauke
Meyara wa Greater Giyani Thandi Zitha u komberile swirho swa Huvo yo Lawula Swikolo (SGB) ku suka eswikolweni swo hambana hambana eGiyani ku tshama swi tinyiketerile eka vutihlamuleri bya swona bya masungulo naswona swi nga pfumeleli ku kuceteriwa kumbe ku onhiwa hi vadyondzisi.
U kandziyisile leswaku swirho swa SGB swi tlanga xiave xa nkoka eku tiyisiseni leswaku swikolo swi lawuriwa kahle, vadyondzi va kuma dyondzo ya xiyimo xa le henhla, naswona switirhisiwa swi tirhisiwa hi ndlela leyi faneleke. Meyara Zitha u tsundzuxile eka swiyimo leswi swirho swa SGB swi kavanyetiwaka hi ku tsakela ka munhu kumbe mintshikilelo ya le handle, leswi nga onhaka vuswikoti bya swona byo teka swiboho leswi vuyerisaka vadyondzi na xikolo hi ku angarhela
Loko a vulavula hi nkarhi wa ntirho wo nyika masagwadi ya swikolo swa Greater Giyani lowu khomiweke hi Ravuntlhanu eHolweni ya Vaaki, meyara u va tsundzuxile leswaku ntirho wa vona i ku seketela vutshembeki bya sisiteme ya dyondzo, ku tiyisisa vulawuri lebyi faneleke, na ku seketela migingiriko leyi antswisaka swiyimo swa dyondzo ku tlula ku nghenelela eka migingiriko leyi va hambukisaka eka vutihlamuleri lebyi.
“Ntirho wa n’wina tanihi SGB a hi ku ya exikolweni ntsena, mi phameriwa swakudya, mi dya ku kondza mi xurha, I vi mi pfumelela ku hlohloteriwa ku endla swiboho swo biha,” ku vula yena. “Ntirho wa n’wina tanihi SGB i ku tiyisisa leswaku swilo swi endliwa hi ndlela leyinene naswona swi vuyerisa vadyondzi. Ku tsandzeka ku endla sweswo swi kavanyeta dyondzo ya vadyondzi na rixaka hinkwaro,” u ye emahlweni, a khutaza swirho swa SGB ku vilela hi vumundzuku bya vana va swona.
“I vutihlamuleri bya n’wina ku langutisisa nhluvuko wa vadyondzi n’hweti yin’wana na yin’wana. Kambe, hi ku ya hi leswi ndzi swi xiyeke ku fikela sweswi, swi vonaka onge a mi hetisisi ntirho wolowo. Mi kavanyetiwa hi swin’wana leswi nga fambelaniki na ku antswisa khwalithi ya dyondzo,” ku vula yena.
Endzhaku eka ntirho lowu, meyara u nyikile tibasari eka khume nkombo wa machudeni lawa endleke swikombelo swa mpfuneto wa timali eka lembe ra dyondzo ra 2024. Tibasari leti ti kongomisa ku seketela machudeni lawa humaka eka mindyangu leyi pfumalaka, ku tiyisisa leswaku swipimelo swa timali a swi kavanyeti ku hlongorisa ka vona dyondzo ya le henhla.
Ku engetela eka masagwadi ya tibasari, meyara u tlhele a nyika sagwadi ra mali ra R10,000 eka khume ra machudeni ha wun’we lawa nga pasa swinene eka swikambelo swo hetelela swa lembe leri nga hundza. Kungu leri a ri kongomisiwile eka ku hlohlotela vadyondzi van’wana ku lwela ku kuma mbuyelo wo hlamarisa eka tidyondzo ta vona.
Hambi leswi machudeni hinkwawo ya khume ya nyikiweke mali yo ringana ya R10,000 ha wun’we ku xixima ku humelela ka wona loku xiyekaka eka tidyondzo, xichudeni xin’we xi pasele ehenhla ku tlula hinkwavo. TariroTheresa Mudzengerere u pasele ehenhla swinene, eka tidyondzo ta nkoka ta Tinhlayo, Sayense , na Accounting. Meyara u vule leswaku ku xiximiwa ka machudeni lawa tirhaka kahle, ngopfungopfu lawa humelelaka eka tidyondzo ta sayense, swi tirha tanihi nsusumeto eka vadyondzi van’wana ku lwela ku teka tidyondzo ta vona ti ri ta nkoka.
Mayelana na matirhelo hinkwawo ya swikolo swa mfumo endhawini ya Giyani, xikolo xa le henhla xa Nghonyama xi humelerile tanihi xikolo lexi tirhaka kahle, xi kuma xiyimo xo sungula exikarhi ka swikolo swa mfumo, kasi exikarhi ka swikolo swa phurayivhete, sagwadi rero ri ye eka xikolo xa phurayivhete xa Nkwangulatilo.
