Vaaki va languteriwa ku vuyeriwa

Hi Orlando Chauke

Hi Ravuntlhanu, Meyara wa Greater Giyani Thandi Zitha u tivise tikontiraka to hlaya leti nga ta tirha eka tiphurojeke ta ku pfuxeta magondzo ya switarata emugangeni wa Siyandhani, Section E na F, leti kongomisiweke eka ku antswisa na ku hlayisa switirhisiwa swa magondzo leswi dyuhaleke eka ndhawu leyi.

Vakontiraka va vekiwile ku endla ku lunghisa ka magondzo na ku lulamisa tindhawu leti khulukaka mati eSection F ku lulamisa nakambe ku khuluka ka mati lama khukhulaka eswitarateni na ku tsutsumela etindlwini hi nguva ya timpfula. Leswi swi ta vuyerisa ngopfu-ngopfu vaaki va le tindhawini ta le hansi leti khukhuriwaka hi minkarhi ya timpfula, lava tiyiseleke ndhambi ku ringana malembe.

 

Ku pfuxetiwa ka magondzo eSection F ku ta tlhela ku katsa ku akiwa ka buloho eka rin’wana ra magondzo lama nga na swiphiqo ekusuhi na Usave, laha mati ya talaka ku hlengeletana egondzweni hi tinguva ta mpfula. Leswi swi kongomisa eka ku antswisa ku khuluka ka mati na ku sivela ku tala ka mati, ku tiyisisa ku hundza loku hlayisekeke no olova eka mimovha na vafambi hi milenge.

Swiyimo swa magondzo leswi antswisiweke eSection F swi languteriwile ku vuyerisa indasitiri ya mathekisi hi ku nyika ndlela yo olova no hlayiseka, na ku hunguta ku onhaka ka mimovha. Leswi swi ta khumba hi ndlela leyinene vafambisi va mathekisi va laha kaya na vakhandziyi.

Loko a vutisiwa hi makungu yo lunghisa gondzo leri nga na swiphiqo eSection F leri hundzaka hi le tlhelo ka Kereke ya True Vine, leri nga suka xikontiri hikwalaho ka ku pfumaleka ka ku hlayisiwa, meyara u boxe leswaku gondzo leri ri ta lunghisiwa hi ku hatlisa loko mali yi kumeka.

“Ha xi tiva xiyimo xa gondzo, kambe hi teke xiboho xo ka hi nga ri lunghisi ku fikela sweswi hikuva hi fanele ku lulamisa mhaka ya mati ya ndhambi lawa ya talaka ku pfala gondzo hi nkarhi wa timpfula. Loko hi ri lunghisa sweswi, ku na khombo ra leswaku timpfula ta matimba ti nga ri onha nakambe,” ku vula yena, a engetela leswaku masipala wu ta vekela etlhelo mali ya yona eka lembe ximali leri taka.

Phurojeke leyi, leyi languteriweke ku teka tinhweti tinharhu, ku vuriwa leswaku yi ta tumbuluxa mitirho eka vaaki va 15 va ndhawu leyi. Meyara u komberile vaaki va Section F ku seketela phurojeke leyi ku sivela ku hlwela na ku papalata swiphiqo leswi nga lavekiki. “Wun’wana na wun’wana loyi a nga na swivilelo mayelana na matirhelo ya phurojeke u fanele ku tihlanganisa na masipala hi tindlela leti faneleke leswaku timhaka ta yena ti ta lulamisiwa handle ko kavanyeta phurojeke,” ku vula meyara.