Muehleketeleriwa wo phangha a khomiwa

 

 

Hi Orlando Chauke

Maphorisa ya xifundzhantsongo xa Mopani, hiku tirhisana na va Mopani Flying Squad, va khomile muehleketeleriwa mayelana na nandzu wo phangha lowu nga humelela hi ti 1 ta Mhawuri emugangeni wa Jim Nghalalume, eGiyani.

Ku khomiwa loku ku kombisa matshalatshala ya ntirhisano ya tiejensi ta nawu ta ndzhawu ya Mopani ku lulamisa migingiriko ya vugevenga na ku tiyisisa vuhlayiseki bya vaaki eka xifundzhantsongo.

Hi ku ya hi swiviko, hi nkarhi wa ku phanga emugangeni wa Jim Nghalalume, muehleketeleriwa wa xinuna loyi a nga tivekiki u nghene endlwini, a yiva mali, swilo swa nkoka na riqingho. Mhangu leyi yi vikiwile emaphoriseni, leswi endleke leswaku ntlawa wa ku landzelerisa wa xifundzhantsongo xa Mopani wu hlengeleta vumbhoni lebyi kongomisiweke eka ku khoma muehleketeleriwa wa 31 wa malembe hi vukhale.

Endzhaku ka kwalomu ka mavhiki mambirhi ya vulavisisi, hi ti 12 ta Ndzhati, ntlawa wo landzelerisa wu kumile hungu mayelana na laha muehleketeleriwa a nga kona. Va yile emahlweni va ya nwu khoma emugangeni wa Mphagani ehandle nyana ka Giyani.

Muehleketeleriwa u kumiwile a ri na riqingho leri a ri yiviwile hi nkarhi wa ku phanga emugangeni wa Jim. Loko vaya emahlweni va secha va kume xibalesa lexi a xi fihliwile, xichinana xa flash, na switirhisiwa swo hambana hambana swo tshova tindlu ekamareni ra muehleketeleriwa. Endzhaku ka sweswo u khomiwile hikwalaho ko va ni xibalesa lexi nga riki na maphepha, ku ehleketeleriwa leswaku u yiviwile ni kuva a ri na switirhisiwa swo tshova tindlu.

Hi nkarhi lowu fanaka, Khomixinara wa Maphorisa wa Xifundzankulu xa Limpopo, Lieutenant General Thembi Hadebe, u vule leswaku ku khomiwa loku ku funghe goza ra nkoka eka ku tlhantlha milandzu ya nhundzu leyi yiviweke eka xifundzhantsongo lexi, tani hi leswi swi kombisaka ku tirha kahle ka vatirhi va nawu va ndhawu eka ku landzelerisa vaehleketeleriwa na ku vuyisa nhundzu leyi yiviweke.

“Ntirho lowu humeleleke wu kombisa ku tinyiketela ka maphorisa ya Xifundzhantsongo xa Mopani, kun’we na Xipano xa Flying Squad xa Mopani, ku tiyisisa vululami na ku ndlandlamuxa vuhlayiseki bya vaaki,” ku vula Hadebe.

Vulavisisi byi ya emahlweni ku kumisisa loko muehleketeleriwa a nga hlanganisiwa na vugevenga byin’wana lebyi fambelanaka na byona na ku kumisisa loko xibalesa lexi nga kumiwa xi tirhisiwile eka migingiriko yin’wana ya vugevenga. Hi nkarhi lowu fanaka, muehleketeleriwa loyi wa 31 wa malembe hi vukhale u languteriwile ku ya ekhoto ya majistarata ya Giyani ku nga ri khale ku ya langutana na swihehlo swo va na nhundzu leyi yiviweke, ku va na xibalesa lexi nga riki na maphepha, na ku phanga.