Tiphurojeke ta GGM ti ya emahlweni kahle

Hi Orlando Chauke

Komiti ya Tiakhawunti ya Masipala (MPAC) yi vika leswaku tiphurojeke eka Masipala wa Greater Giyani (GGM) ti ya emahlweni kahle, hambi leswi tin’wana ti langutaneke na ku hlwela. Ntirho wa MPAC i ku langutisisa ndlela leyi mali ya mfumo yi tirhisiwaka ha yona, ku tiyisisa leswaku yi tirhisiwa kahle na leswaku vaaki va tivisiwa hi yona.

Eka ntshamo wa huvo wa sweswinyana, Mutshamaxitulu wa MPAC Eric Makondo u kandziyisile tindhawu leti lavaka nyingiso ku hlayisa no tiyisisa leswaku tiphurojeke hinkwato ta GGM ti famba khwatsi.

“MPAC yi kambisisile tiphurojeke leti yaka emahlweni eka Masipala wa Greater Giyani naswona yi kumile leswaku to tala ti famba kahle. Hi endzele tiphurojeke ta kwalomu ka 18; vunyingi bya tiphurojeke leti ti famba khwatsi, naswona tin’wana se ti herile. Phurojeke yo nonoka ntsena yi le mugangeni wa Mavalani, kambe yi ya emahlweni,” ku vula Makondo hi nkarhi wa ntshamo wa huvo.

Makondo u xiyile leswaku ku pfuxetiwa ka tisenthara ta mintlangu ta Mageva na Giyani Section E a ku si sungula hikuva tikontiraka a ti si hlawuriwa. Ku hlwela loku ku khumba mphakelo wa vukorhokeri, hikokwalaho u komberile masipala ku hlawula tikontiraka hi ku hatlisa.

“Hambileswi swi twisisekaka leswaku ku na tikontiraka ti nga ri tingani leti nga fikeleriki swilaveko, leswi a swi nge yi emahlweni hilaha ku nga heriki. Hi fanele ku lulamisa leswi ku nga ri khale, naswona loko ku hlwela ku fanele ku humelela, MPAC yi fanele nyika mpfumelelo,” a engetela.

Senthara ya Mintlangu ya Mageva yi vile na timhaka to tala naswona yi tala ku va eka mahungu hikwalaho ka swivangelo swo biha. Hambi leswi masipala wu heteke senthara leyi, yi tshamile yi nga tirhisiwi hikwalaho ka swivilelo swa vaaki mayelana na ndhawu yo tshama ya vahlaleri na rivala ra mintlangu.

Ndhawu yo tshama ya vahlaleri yi ehleketeleriwa kuva yinga hlayisekanga naswona yi nga nyawuri, hikokwalaho swiphiqo leswi swifanele ku lulamisiwa leswaku senthara yi ta pfuna hiku hetiseka eka vaaki. Rivala rona ritlhela rilava ku antswisiwa leswaku ri ta fikelela swipimelo swa vuhlayiseki na khwalithi.

Senthara ya Mintlangu eSection E, leyi na yona yi nga va eka mahungu, a yi si tshama yi hetiwa naswona yi hundzuke ndhawu ya swigevenga. Yi akiwile xiphemu ntsena, naswona masipala wa karhi wa yima yima ku tiyisisa leswaku phurojeke leyi yi fika emakumu.