Vaaki va hlundzukisa hi vukorhokeri bya Eskom
Hi Orlando Chauke
Vaaki lava humaka eka makaya ya khume mune eKremetart, Giyani, va hlundzukele Eskom endzhaku ko lahlekeriwa hi gezi ku ringana masiku ya mune, ku sukela hi Sonto ku fikela hi Ravumune nimadyambu.
Hambi leswi hi ntolovelo Kremetart yi nga ri ki na mphakelo wa gezi hi nsiyerisano [load reduction] hikuva vanhu vo tala va hakela gezi ra vona, vaaki lava a va ha sale emunyameni.
German Mashimbye, un’wana wa vaaki lava khumbekeke, u hlamuserile, “Swakudya swa hina efirijini swi onhakile, naswona vana va hina va lava gezi leswaku va ta kota ku hlayela swikambelo leswi va langutaneke na swona”
Mashimbye na vaaki van’wana vayile ehofisini ya Eskom kuya kombela ku pfuniwa kambe va rhumeriwile kusuka eka ndzawulo yin’wana kuya eka yin’wana handle ko kuma tinhlamulo. Masiku man’wana, a va tlheriseriwa egedeni, va byeriwa leswaku vatirhi va le minhlanganweni. Loko va hetelela va vulavula na Eskom, va byeriwe leswaku vatirhi va khomekile hi ku tirha kun’wana.
Gezi ri vuyisiwile endzhaku ka masiku ya mune, kambe vaaki va titwa va khomiwile hi ndlela yo biha, tani hi leswi va nga vaxavi lava hakelaka nkarhi na nkarhi lava landzelaka milawu ya Eskom.
Muvulavuleri wa Eskom Matshidiso Madzivandila a nga hlamulanga swivutiso mayelana na vukorhokeri byo biha lebyi nyikiwaka vaxavi lava hakelaka.
