Malume wa n’wana wa 11 wa malembe hi vukhale loyi a nga pfinyiwa ku suka emugangeni wa Nkuri eGiyani a nga tshembi leswaku munhu loyi a nga pfinya n’wana wa makwavo wa yena u tsutsumele eJoni, tani hi leswi maphorisa na vanhu van’wana va ndhawu leyi va hehlaka leswaku u endlile tano. Malume loyi, Abel Mthombheni, u vula leswaku vanhu va tshamela ro vona muehleketeleriwa eka miganga akelani.
“Xiphiqo hi leswaku, maphorisa a ya endlanga vulavisisi kahle; va lo hatlisela ku tshemba mahungu lama hangalakeke ya leswaku muehleketeleriwa u balekele eJoni. Hi tshama hi ri karhi hi twa mahungu ya vanhu lava n’wi vonaka emigangeni ya le kusuhi,” ku vula yena.
Marito ya yena ya landzela ku pfinyiwa ka n’wana wa makwavo wa yena wa 11 wa malembe hi vukhale hi muehleketeleriwa loyi a tivekaka loyi a n’wi teka tani hi makwavo wa xinuna. Muhlaseri loyi ku vuriwaka leswaku u tiviwa hi ndyangu wa muhlaseriwa, u n’wi siye a ri na swivati enhan’wini, leswi endleke leswaku vanhu va tshemba leswaku a ringeta ku n’wi dlaya leswaku a ta herisa vumbhoni.
Endzhaku xitori lexi xi hangalakile eka swiyenge swa mabulo, laha vanhu va nga veka swifaniso swa muehleketeleriwa. Leswi, hi ku ya hi muvulavuleri wa maphorisa ya Giyani Ridgewell Rikhotso, swi endle leswaku muehleketeleriwa a baleka maphorisa ya nga si fika eka yena.
Xifaniso lexi humaka eka Facebook lexi kombisaka munhu loyi a lavekaka eka nandzu wo pfinya
“Vaaki va le ndzhawini leyi va endle xihoxo lexikulu hi ku n’wi veka eka swiyenge swa mabulo hi nga si fika eka yena,” u hlamuserile, a tlhela a engetela leswaku loko a hetelela ku lavisisa, ku vuriwe leswaku muehleketeleriwa u tumbele eTembisa exifundzheninkulu xa Gauteng.
Loko a vutisiwa mayelana na loko muhlaseriwa a kuma mpfuneto wo karhi, Mthombeni u vule leswaku a nga kumanga nchumu handle ka vukorhokeri bya vutshunguri lebyi a byi kumeke endzhaku ka maxangu lawa. Ku hehliwa leswaku u lulamiseriwile ku ya hlangana na mutivi wa miehleketo ku pfuneta ku lawula matitwelo ya yena hi ku tirhisa vutsundzuxi, kambe va tivisiwile leswaku mutivi wa miehleketo u le ku wiseni.
“Va vule leswaku hi fanele ku vuya hi Ndzhati, naswona sweswo swi vanga ntshikilelo lowukulu eka manana wa n’wana, loyi a nga si tshamaka a va vu yena ku sukela eka mhangu leyi,” u ye emahlweni, a vula leswaku muhlaseriwa u languteka a ri kahle loko a pimanisiwa na mana wa yena, loyi a nga tirhiki naswona a hanyaka hi a mpfuneto wa vana wa mfumo.
“Leswi hi swi lavaka sweswi i ku va n’wana a pfuniwa hi ku hatlisa loko ntokoto wolowo wu nga si n’wi hundzula nchumu wun’wana. A nga ha languteka a ri kahle loko u ri ekule, kambe a wu nge swi tivi leswaku ku humelela yini endzeni ka miehleketo ya yena,” a vula.
