Winners Park yi hlula ro sungula eka Nedbank Cup
Hi Orlando Chauke
Winners Park yi hlule Maruleng Celtics hi 1-0 eka ntlangu wa Nedbank Cup lowu a wu tlangiwa erivaleni ra mintlangu ra Xikukwani eGiyani hi Mugqivela. Ku hlula loku ku va pfulela ndlela yo ya emahlweni eka mphikizano wa Khapu ya Nedbank.
Ntlangu lowu wu sungurile hi xiyimo xa matimba, laha va Winners Park a va kombisa mafulufulu. Va sungule minhlaselo leyi nga heriki ku suka eka matlhelo hinkwawo, n’watipala wa Maruleng Celtics a khomekile tanihi leswi ti bolo a ti tshamela ro kongomisiwa etipaleni, ti hundza le ku suhi ni nete.
Hi matshalatshala yo phikelela, Winners Park yi hetelele yi swi kotile howisa goli yin’we eka tandza ku sale timinete ti nga ri tingani ntsena ku vaya eku wiseni [halftime]. Ti bolo leti va ti kongomiseke eti paleni a ti ringana ntlhanu leswi swi nga veka ntshikelelo lowukulu eka Maruleng Celtics kambe yi lwile hi matimba ku sivela tigoli leti n’wani.
Ku tlanga ka Maruleng Celtics loku nga tsakisiki eka hafu yo sungula ku hlundzukise muzaberi-nkulu wa vona, Luxolo Ngcuthushe, loyi a tivekaka tanihi “The Big Boss”. Ku vilela ka yena ku vonake ngopfu hi nkarhi wa ku wisa loko a ri karhi a tshinya vatlangi va yena hi rito lerikulu, a ku, “I yini lexi tikaka hi ku tlanga bolo ya milenge leyi faneleke? Ha yini mi fanele ku tlanga hi ku ya hi ndlela leyi va swi lavaka ha yona? Xana mi rivele leswi mi nga laha?”
U tlhele a va tsundzuxa leswaku va nga titshegi hi ku nyikana bolo va ri ekule na le kule, a vula leswaku a nga lavi ku vona munhu a tlanga bolo yo leha handle ka loko swi laveka hi ku helela.
Loko va vuya eka hafu ya vumbirhi, Maruleng Celtics a yi languteka yi ri xipano lexi hambaneke hi ku helela. Minhlaselo ya Winners Park yi ve yi dzika loko Maruleng Celtics yi tshamisekile eka ntlangu hi vulawuri lebyikulu, yi lwa ku fana na nghala leyi nga na ndlala leyi tiyimiseleke ku kuma swakudya ku nga si va munyama.
A swi ri erivaleni leswaku ku tshinyiwa hi muzaberi wa vona swi tirhile, tani hi leswi Maruleng Celtics yi nga lawula hafu ya vumbirhi, hambi leswi va tirheke hi ku hiseka, ntlangu lowu wu fikile emakumu laha Winners Park yi nga hlula hi 1-0, leswi siyeke Maruleng Celtics yi khunguvanyekile.
Hi nkarhi lowu fanaka, xipano lexi hluleka ku suka eka swipano swa ABC Motsepe Stream A xi lulamerile ku langutana na xipano lexi hluleke ku suka eka Stream B. Xipano lexi nga ta hlula ntlangu lowu xi ta ya emahlweni xi tlhontlha xipano xa PSL eka mphikizano wa switeki swa le henhla eka Khapu ya Nedbank.
Hambileswi mphikizano lowu wu phikizanaka swinene exikarhi ka swipano swa ABC Motsepe, Mpheni Home Defenders yi veka nxungeto lowukulu, tani hi leswi ku nga vona ntsena xipano lexi nga na ntokoto wo tlanga eka xiyimo xa PSL. Ntokoto wa vona wa khale wa xiyimo xa le henhla wu nga va nyika ku humelela eka mphikizano.
