MEC a nyikela yunifomo ya xikolo

Hi Ntsakisi Gracia Chauke

MEC wa Ndzawulo ya Nhluvukiso wa Vaaki wa xifundzhankulu xa Limpopo, Florence Radzilani, u vula leswaku dyondzo yin a nkoka ku hluvukisa tiko.

Manana Radzilani u vurile leswie eSselamani ehansi ka masipala wa Collins Chabane laha a nga nyikela tiyunifomo hi siku ra vu 5 Nyenyenyani 2025 tani hi xiphemu xa Nongonoko wa Nseketelo wa Vadyondzi,

Vadyondzi va 148 ku suka eka swikolo swa le hansi swa Mashobye, Hlawulekani, na Mkhacani va amukerile tiyunifomo ta swikolo.

“Leyi I ndlela ya mfumo yo ringeta ku pfuneta no seketela vana lava sweleke emigangeni,” ku vula manana Radzilani.

U vurile leswaku leswi swi komba nkoka lowu mfumo wu tekaku dyondzo hi yona.

Ntirho lowu a wu ngheneriwile hi varhangeri va miganga, ku katsa na Cllr. Simon Xihlamariso Mavikane loyi a khome tintambhu ta meyara wa Collins Chabane tatana Gezani Shadrack Maluleke, Chiefwhip Cllr. Eric Baloyi, hosi Xikundu na tihosana ta miganga ya ndhawu liya, Cllr. Rose Mathuka, na mufambisi wa sekete ya Malamulele North East manana Tintswalo Rikhotso.

Vahlonipheki lava va joyinile MEC Radzilani eka ntirho wa nkoka lowu nga kandziyisa ku tinyiketela ka mfumo eka dyondzo na vuhlayiseki bya vana.

Eka mbulavulo wa yena, MEC Radzilani u kandziyisile nkoka wo nyika vadyondzi masungulo yo tiya.

“Tanihi mfumo, hi tshemba leswaku i ntirho wa hina ku aka masungulo lamanene ya vumundzuku bya vana va hina,” ku vula yena.

U tlhele a tsundzuxa vatswari ni vadyondzi leswaku va tlangela nseketelo lowu va wu kumaka.

“Mi na nkateko wa leswaku mfumo wu mi pfuna, ku hambana na khale laha swilu a swi tika swinene,” ku vula yena.

Loko a ya emahlweni na mbulavulo wa yena, MEC Radzilani u tshembisile hosi leswaku ndzawulo ya yena yi ta vuya na minyikelo yin’wana ku ya emahlweni yi seketela vadyondzi lava pfumalaka.

U komberile vatswari ku hlayisa yunifomo ya xikolo kahle naswona u tiyisisile leswaku mfumo wu ta tshama wu tinyiketerile eka mhaka leyi.

U tlhele a ringanyeta leswaku SASSA na vatirhela-mfumo va ndzawulo va tirhisana na vurhangeri bya ndhavuko eka ku kamberiwa ka mindyangu leyi pfumalaka. “Varhangeri va ndhavuko va tlanga xiphemu xa nkoka eku kumeni ka mindyangu leyi nga swela endzeni ka miganga ya vona,” ku engetela manana Radzilana.

Swa ha te tano, ntirho lowu wu kombisile matshalatshala ya mfumo lama yaka emahlweni yo lulamisa vusweti na ku antswisa mfikelelo wa dyondzo etindhawini ta le makaya.

Nongonoko wa Nseketelo wa Vadyondzi wu kongomisa ku nyika switirhisiwa swa nkoka eka vana lava hi ndlela yin’wana va nga ha tsandzekaka ku nghena xikolo hikwalaho ka mintlhontlho ya swa timali.

Kungu leri ri yimela goza ra nkoka ro pfala xivandla xa dyondzo na ku tiyisisa leswaku vadyondzi hinkwavo va na switirhisiwa leswi va swi lavaka ku humelela.