Khombo eLimpopo: Wanuna wa makume ntlhanu wa malembe hi vukhale u dlaye nsati wa yena endzhaku ko holova
Wanuna wa makume ntlhanu wa malembe hi vukhale loyi a tshamaka eMankweng unit D, ekusuhi na Polokwane, ku vikiwa leswaku u dlaye nsati wa yena laha va tshamaka kona hi Sonto .
Kasi Maphorisa ya tiyisisile mhangu leyi,laha va paluxaka leswaku wanuna loyi u tinyikerile eMaphoriseni endzhaka ka Mhangu leyi.
Muvulavuleri wa maphorisa ya Limpopo Malesela Ledwaba u vula leswaku nuna na nsati va vile na mholovo leyi nga hatla yi hisa naswona ku hehliwa leswaku n’wanuna loyi u humese xibamu kutani a duvula nsati wa yena.
“Ku hehliwa leswaku muehleketeleriwa na muhlaseriwa lava nga nuna na nsati va vile na njhekanjhekisano,” ku vula muvulavuleri wa maphorisa ya Limpopo Malesela Ledwaba.
“Swi tikomba onge njhekanjhekisano wu sungule ku hisa swinene ku kondza n’wanuna a humese xibamu xa 9mm kutani a duvula nsati wa yena,” ku engetela Ledwaba.
Loko Ledwaba a ya emahlweni u vurile leswaku muhlaseriwa u tsutsumerisiwile exibedlhele hi ambulanse naswona u ve a hundza emisaveni hikwalaho ka ti mbanga.
Hi ku ya hi Ledwaba, xihlovo xa njhekanjhekisano exikarhi ka vatekani lava a xi tiveki.
Muehleketeleriwa u lulanguteriwile ku ya ekhoto ya majistarata ya Mankweng ku ya langutana na swihehlo swo dlaya ku nga ri khale.
Maphorisa va le ku lavisiseni ka mhangu leyi naswona va kombela un’wana na un’wana loyi a nga na vuxokoxoko ku ta hlanganisa na vona.
