Team G-One vs Manavhele: Swihehlo swa vatlangi lava nga tsarisiwangiki erivaleni ra Mintlangu ra Mdabula
MALAMULELE – Rivala ra mintlangu ra Mdabula sweswinyana rive emononweni ngopfu, endzhaku ka swiendlo leswi swinga humelela mahelo ya vhiki leri hi suka ka rona.
Xipano xa Team G-one xi endle xikombelo eka tihofisi ta ligi laha va hehlaku Xipano xa Manavhele hiku tirhisa mutlangi loyi a nga tsarisiwangiki hi nkarhi wa ntlangu wa vona.
Ku ya emahlweni, Zingha Young Tigers yi hlamule hi ku hlundzuka eka ku hluriwa ka yona hi 2-0 hi Gumbani Young Stars naswona yi hlasele mufambisi wa ntlangu.
Loko hi burisana na matsalani wa Collins Chabane League, Mr. Mashele u vule leswaku, vatava na ntshamo wo tshinya mayelana na mintlangu leyi ha yimbirhi leyi nga tlangiwa erivaleni ra Mintlangu ra Mdabula ku nga ri khale.
“..eka vatlangi va Zingha Young Tigers lava ku vuriwaka leswaku va hlaserile mufambisi wa ntlangu, vata languteriwa ku ti vonakarisa eka ntshamo wo tshinya hiku copeta ka tihlo,” ku vula Tatana Maluleke.
“Hita tlhela hiva na ntshamo na xipano xa Team G One, lexi hehlaku Xipano xa Manavhela Black Rangers hiku tlangisa mutlangi loyi a nga tlanga anga tsarisiwangi,” ku engeta Mashele.
Loko Tatana Mashele a ya emahlweni u boxe leswaku siku ra ntshamo wo tshinya eka nkarhi wa sweswi a ri tiveki.
Mashele u yile emahlweni a vula leswaku “draw” ya quarter-final eka mphikizano wa Mpho Mathoho knockout yi ta va kona hi Ravuntlhanu nimadyambu etihofisini ta LFA Collins Chabane League.
