Mimovha Yinharhu Yi Katseka Eka Mhangu Leyi Nga Siya Muchayeri A Lovile
ku humelerile mhangu yo vava eka patu ra R81 leri yaka eNtimani brickyard leyi nga siya Muchayeri wa Volkswagen Polo, loyi a nga se tiviwaka, u lovile kwalano.
GIYANI – Mhangu leyi yi humelerile hi Ravuntlhanu nimadyambu endzhaku ka loko mimovha yinharhu yi tlumbane. Muchayeri wa Polo u tivisiwa leswaku u hundzile endhawini ya mhangu, kasi vahlaseriwa vanwani lava vanga vaviseka va yisiwe exibedlhele xa le kusuhi kuya kuma vutshunguri.
Xivangelo xa mhangu leyi xa ha lavisisiwa, kambe vulavisisi byo sungula byi paluxe leswaku mimovha yinharhu yi tlumbanile, endzhaku ka loko movha wa vumune lowu nga vanga mhangu leyi, wu balekile.
Sejeni Ridgewell Rikhotso, muvulavuleri wa maphorisa eGiyani, u boxe leswaku movha lowu a wu landzela VW Polo wu tlumbanile na yena hi le ndzhaku, kutani wu baleka.
“endzhaku ka loko a tlumbiwile hi le ndzhaku, swi endli leswaku muchayeri wa POLO a lahlekeriwa hi vulawuri bya movha kutani a hambuka a ya eka layini yin’wana kutani a tlumbana ni movha lowu a wu famba hi ndlela leyi hambaneke, leswi swi nga endla leswaku a hundza emisaveni.” Ku vula Sejeni Rikhotso.
“Mufi a nga tiveki eka karhi lowu, naswona ntsumbu wa yena wu yisiwe exibedlhele xa Nkhensani mortuary.” Ku engeta Rikhotso.
“Muchayeri na mukhandziyi wa movha lowu nga chayisa va yisiwe exibedlhele va ri eka xiyimo xo tika ku ya kuma vutshunguri,
Rikhotso u engeterile leswaku maphorisa ya kume layisense yo chayela ya H Mabasa emovheni wa mufi, naswona va kombela vaaki ku va pfuna ku kuma ndyangu wa mufi.
Vanhu va nga pfuneta hi ku tihlanganisa na Warrant Officer Chauke eka 0827290343 kumbe hi ku bela riqingho eka nomboro ya Crime Stop 0860010111.
