Ndyangu wu pona ri Ahlamile

Hi Andrew Hlongwane

Manana wa 44 wa malembe hi vukhale u hlamusela leswaku hambi kuri namuntlha u hava ku tshemba leswaku yena, Vamakwavo na Vana va pone njhani eka langavi ra ndzilo leri ri nga heta yindlu ya ka vona.

Manana, Given Ngobeni, kusuka emugangeni wa le Dan Vuk’uzendzele ehandlenyana ka doroba ra Tzaneen kwala xifundzenikulu xa Limpopo va sala va ri hava ndhawu ya ku tumbeta nhloko, endzhaka ka loko yindlu ya vona yi tava yi herile hi ndzilo.

Given u hlamuserile leswaku a kuri 3am ku xela sonto loko a twa mpfumawulo kusukela eka yinwana ya ti kamara. “Ni pfukile ku ya languta leswaku i pongo wa yini, kambe ni xewetiwile hi ndzilo,” ku vula Manana Given Ngobeni.

“Ndzi karile xo xi endla ku kondza ndzi ntwa pongo wa Vaaki ehandle lava a valwa na ku tshova ghedhe va ngena hi xikongomelo xo lava ku hi pfuna,” ku engeta Ngobeni.

Loko Ngobeni a ya emahlweni u vurile leswaku, “ndzi pfuxile Lonia leswaku hi vonisana hi ndzilo lowu. Hi ku pfunana na Lonia hi swikotile Ku humesa nhungu wa vana endzeni ka yindlu.”

Loko Ngobeni a burisana na phephahungu ra Nthavela u vurile leswaku a nga se twisisa nchumu leswaku swita njhani xikwembu xi va xanisa hi ndlela leyi.

“Manana wa hina xikan’we na Kokwani va lovile va hi siyela yindlu na kona a hi tirhi hinkwenu ka sweswi. A hi switivi leswaku hi ta sungula kwini hambi kuri pulangu rinene hi nge fikeleli ku ri xava,” a ya emahlweni.

Lonia u hlamusela leswaku va swi lamulela mhangu va fikile endzaku ka ti awara tinharhu naswona a ku lo sala makhumbi ku kombisa leswaku a kuri na ndhawu yo tumbeta nhloko.

Ndzilo lowu wu hlaserile Movha wa kwala kaya, swiambalo swa hina, nhundzu ya le ndlwini, switifikheti swo bhebhuriwa swa vana, hambi kuri swa xikolo swa hina, mapasi, tibuku ta vana va xikolo na swinwana swotala.

Vanhu hikwavho va hlayisekile naswona kuhava lo yi a nga vaviseka eka mhangu leyi.

Hambiswiritano va masipala va nyikerile hi thende eka va ka Ngobeni, leswaku va ta tumbeta nhloko ka karhi wa sweswi.

Ndyangu lowu u kombela ku pfuniwa hi xin’wana na xin’wana ku katsa swa kudya, swiambala hambi kuri swilo swo aka swotani hi mazengi, Mapulangi yo fulela kumbe hambi kuri tisemende.

Loko a ri kona musamariya a nga ti hlanganisa na ndyangu wa ka Ngobeni eka nomboro ya riqhingho ya 072 466 6928 kumbe 060 712 0768.