Xitimela Xa Rivilo Xo ya Joni xi le Ndleleni.

Hi Themba Chauke

Tiko ra Afrika-Dzonga ri le ndleleni yo simeka Xitimela xo sungula xa rivilo ra le henhla, naswona vumaki bya phurojeke leyi byi ta sungula emaheleni ya lembe ra 2026, loko Xitimela xi ta sungula ku famba hi lembe ra 2030. Tanihileswi swi vikiweke hi va Auto Top, Ndzawulo ya Vutleketli hi ku tirhisana na mifumo ya swifundzhankulu swa Gauteng na Limpopo ku vuriwa leswaku va lulamerile ku sungula phurojeke leyi yo endla xiporo xa 500km xo suka ePitori ku ya eMusina eLimpopo.

Xitimela lexi eka xiphemu xo sungula, xi ta yima eHammanskraal, Bela-Bela, Mokopane na le Polokwane, tanihileswi xiyenge xo sungula xa phurojeke xi nga ta va xi kongomisiwile eka kusuka ePitori ku ya ePolokwane. Ku vuriwa leswaku mpfuka lowu wa 265km, wu ta hunguta nkarhi wo suka Pitori ku ya Polokwane hi awara loko munhu a famba hi xitimela tanihileswi xitimela xi nga ta famba 90 wa timinete loko ku fananisiwa na movha lowu fambaka tiawara tinharhu egondzweni ra N1.

Hambileswi ku bumabumeriwaka leswaku xitimela lexi xi ta famba 177kmh, ku vuriwa leswaku eka swiphemu swin’wana swa ndlela, xi ta swi kota ku famba rivilo ro hundza 200kmh. Kasi phurojeke leyi yi kunguhatiwile hi nkarhi wun’we na wo ndlandlamuxa Xiyenge xa Vumbirhi xa Gautrain kusuka eka 80km ku ya 230km. Ku vuriwa leswaku makungu yo endla migingiriko leyi ya ta va ya fikile emakumu hi lembe ra 2025, hambileswi nkarhi lowu wu nga tiyisisiwangiki.