Muhlapfa a Tsoniwa Beyili hi Nandzu wo Pfinya Xinhwanyetan

Themba Chauke

Khoto ya Majisitarata wa Atteridgeville-Pitori, yi tsonile beyili wanuna wa malembe ya 55, o ta a huma hi le tiko akelana ra Zimbabwe eka nandzu wo pfinya xinhwanyetana xa malembe ya 12, lexi ku nga n’wana wa laha a hirheke kona eSaulsville . Mhangu leyi yi humelerile hi n’hweti ya Nyenyenyankulu 2025.

Ku vuriwa leswaku muehleketeleriwa loyi a ri na maendlelo yo vitana xinhwanyetana lexi eka kamara leri a hirheke eka rona ra le handle, ekaya ra xinhwanyetana lexi hi minkarhi yi nharhu yo hambana-hambana laha a nga xi pfinya kutani a xi nyika mali yo sukela eka R24 ku fika eka R50 ku ya xava kota.

Kasi hi siku ra 25 Khotavuxika 2025 ni madyambu, xinhwanyetana lexi a xi ri ku vulavuleni hi riqingo loko mana wa xona a xi vutisa leswaku xi vulavula na mani, kambe xi tsandzeka ku hlamula, kwalaho mana wa xona u tekile riqingo ku Kambisisa leswaku xi vulavula na mani. Mana wa xinhwanyetana lexi, u hlanganisiwile hi hungu ro suka eka mukhalabya leri a ri vutisa xinhwanyetana leswaku xi ya rini emasikwini. Mana wa xinhwanyetana hi ku hlundzuka, u landzile mukhalabya loyi ku ya n’wi vutisa, kambe mukhalabya u kanetile mhaka leyi laha n’wana a nga yisiwa exibedlele xa Kalafong ku ya kamberiwa. Loko va ri exibedlele, un’wana wa vaongori u vitanile maphorisa naswona muehleketeleriwa u khomiwile xikan’we-kan’we endhawini liya.

Hi nkarhi wa ntshamo wa le khoto muehleketeleriwa hi ku tirhisa vayimeri, u komberile ku ntshuxiwa hi beyili a vula leswaku nandzu lowu a wu na ntikelo a tlhela a kombisa vutihlamuleri byo hlayisa nsati na vana va ntsevu.
U yile emahlweni a vula leswaku wa titirha naswona ku pfaleriwa ka yena swi ta kavanyeta muholo wakwe xikan’we na vuswikoti byo fikelela tihakelo ta vayimeri.
Muchuchisi wa Mfumo Katlego Manana u kanetile beyili a vula leswaku nandzu lowu wu na ntikelo. Manana u kombisile leswaku ku na nxungeto wa leswaku mutwisiwakuvava a nga kavanyeta vulavisisi tanihileswi a tivanaka swinene na mutwisiwakuvava xikan’we na mana wakwe. U tlherile a kombisa leswaku xin’wana hi leswaku muehleketeleriwa loyi, u hava tinhundzu laha tikweni leswi swi nga endleka leswaku a dya ehansi a ya eka rikwavo hi ku chava ku tenga nandzu.

Majisitarata u vurile leswaku muehleketeleriwa a nga humesanga vumbhoni bya leswaku wa titirha naswona a ku na vumbhoni bya leswaku u tshama na nsati na vana kumbe u va siyile eka rikwavo eZimbabwe. Majisitarata u kombisile leswaku loko muehleketeleriwa a tsandzeka ku hakela vayimeri loko a pfaleriwile ehokweni ya tisulavoya, a nga ha endla xikombelo xa vayimeri va mfumo va mahala, leswi hi swona swi nga endla leswaku a tsoniwa beyili. Nandzu wu hundziseriwile emahlweni ku ya eka siku ra 23 Mawuwani 2025, ku yisiwa ekhoto ya Xifundzha.