Ku Lunghisiwa ka Rivala ra ka Mageva

Hi Themba Chauke

Hi siku ra 08 Mawuwani 2025, meyara wa masipala wa Giyani mukhaselara Thandi Zitha, u paluxile ximfumo mukondiraka loyi a nga ta lunghisa rivala ra mitlangu ra ka Mageva, eka nhlengeletano ya masipala na swiyenge swa vaaki va ka Mageva.

Leswi swi nga ta lunghisiwa eka rivala leri swi katsa; rivala ra ntlango wa bolo ya milenge, leri vitaniwaka byasi bya kikuyu na sisitimu yo cheleta; ku chela ehansi eka rivala ra matsambu; ku antswisiwa eka ndhawu yo tshama vahlaleri; ku hoxa rinhlapfu eka rivala ra ntlango wa bolo ya milenge; ku hoxiwa ka heke yo nghena vanhu; ku akiwa ka tipala timbirhi ta le henhla ta timboni ; Ku antswisiwa ka lwangu eka miako ya swihambukelo; Ku antswisiwa ka lwangu ra yindlu ya varindzi; ku antswisiwa ka rivala ra mitlangu yo hambana-hambana; ku antswisiwa ka mati yo borhiwa na ku hoxa michini yo koka mati xikan’we na ku antswisa vumaki bya gezi.

Loko a vulavula hi nkarhi wa nhlengeletano, meyara u komberile swiyenge swa vaaki ku tirha xikun’we na mukondiraka ku tiyisisa leswaku phurojeke leyi yi famba hi ndlela ya kahle, leswaku phurojeke leyi yi ta fika emakumu hi nkarhi lowu wu vekiweke, laha a vuleke leswaku ku hambana hi miehleketo swi fanele ku lulamisiwa hi ku twanana ehandle ko yimisa phurojeke.

Ku vuriwa leswaku loko swilo swo famba hi laha ku kunguhatiweke ha kona, phurojeke leyi yi ta fika emahumu hi tin’hweti ta khume na swona ku ta thoriwa vanhu vo hundza 20. “Hi lava ku heta phurojeke leyi hi nkarhi lowu wu nga hetiki mbilu, ku tiyisisa leswaku vantshwa va le tindhawini ta ka Dzumeri va na ndhawu yo yi tirhisa eka timhaka ta mitlangu,” ku vula meyara.

Meyara a heleketiwile hi Nhloko ya Nhluvukiso wa Vumaki mukhaselara Thamsanqa Mabunda, Nhloko ya Mitlangu, Vutshila na Ndzhavuko mukhaselara Christinah Zitha, Mufambisinkulu wa Xithekiniki Bongani Mashele, na Mukhaselara wa wadi Lenny Nkuna.

Ends.