LEMONDOKOP YI HUNDZELA EKA RHENGU RA VU 16
Hi Themba Chauke
Nyimpi yo lwela Dzana ra magidi wa tirhandi eka thonamete ya lembe ya Shawela Madrid, leyi khomeriwaka emugangeni wa Shawela eGiyani yi sungurile. Se swi endla vhiki ra vumbirhi laha swipano kusuka eka tindhawu to hambana-hambana exifundzenintsongo xa Mopani swi tlanga mitlangu ya swona yo sungula ku tiva leswaku swi kongoma kwihi.
Thonamete leyi yi hlanganisa 32 swa swipano swa le henhla kusuka etindhawini ta Giyani, Phalaborwa na le Letaba, laha ku lweriwaka xidlodlo xa R100 000. Mphikizano lowu wa tin’hweti timbirhi wu komba leswaku swipano swi phikizana vhiki na vhiki, laha swipano leswi hlulaka swi hundzelaka emahlweni ku kondza ku kumeka muhluri la nga ta havaxeriwa xidlodlo.
Hi mahelo ya vhiki leri hundzeke, Masipala wa Letaba wu vonile xipano xa wona xa Lemondokop, xi hundzela eka rhengu leri landzelaka endzhaku ka kuhlula xipano xa Bafana-Va-Moya kusuka emugangeni wa le Shawela hi 3-0. Ntlangu lowu a wu khomeriwile erivaleni ra mitlangu ra Shawela hi Mugqivela, laha vaseketeri va xipano xa le kaya a va seketela xipano xa Bafana-Va-Moya, lexi sunguleke ntlangu ingaku xi nga hlula.
Endzhaku ka timinete to sungula ta ntlangu, swilo a swi famba swi tikomba ingaku xipano xa le kaya xi ta hlula tanihileswi vaseketeri a va ri etlhelo ka xona. Va yile emahlweni hi matimba va boxeketa vatlangi va le ndzhaku va Lemondokop ko hlaya, kambe va tsandzeka ku hundzula mikateko leswaku yi va tigolo.
Lemondokop hi le tlhelo a ku nga ri xipano xo dya byi rhelela. Va tlangile ku fana na xipano xa le kaya hi matimba, va tlherisela hinkwaswo leswi a swi rhumeriwa eka vona, leswi endleke leswaku ntlangu wu va wa mphikizano wa le henhla swinene. Hambiswiritano, loko ku sele timinete leswaku ntlangu wu ya ekuwiseni, va kumile nkateko va tlhela va wu tirhisa. Va howisile golo kutani xikoro xi ku 1-0.
Loko xipano xa le kaya na vahlaleri va ha hlamarisiwile hi golo yo sungula, Lemondokop yi tlhele yi vuya nakambe. Va korile golo ya vumbirhi kutani va tlhelela endzhaku ku ya sirhelela xikoro xa vona.
Eka xiphemu xa vumbirhi, va yile emahlweni va tlanga kahle, hi ku sirhelela hi vukheta, leswi hlundzukiseke xipano xa le kaya swinene. Ku chela munyu ehenhla ka xilondza, Lemondokop yi howisile golo ya vunharhu, leswi a ku ri ku belela xipikiri xo hetelela hi nkarhi lowu a ku sele timinete tintsongo leswaku ntlangu wu fika emakumu.
Ku hlula loku ku vonile xipano xa Lemondokop xi hundzela emahlweni ku ya eka rhengu leri landzelaka ra swipano swa 16, loko ka ha ri na swipano swo hlaya leswi faneleke ku tlanga mitlangu ya swona yo sungula. Phalaborwa yi na swipano swimbirhi leswi ngheneke eka rhengu ra swipano swa 16 ku fika sweswi, loko Letaba yi ri na xin’we. Giyani yi rhanga emahlweni hi swipano swinharhu.
Hi hala tlhelo, xipano lexi nga ta hlula mphikizano lowu, xi ta famba na ntsengo wa R100 000, loko xa vumbirhi xi ta kuma R50 000. Kasi swipano leswi nga ta kuma swiyimo swa vunharhu na vumune swi ta kuma R10 000 ha xin’we.